د امریکا د ۲۰۲۸ کال ولسمشریزو ټاکنو ته لا هم څه باندې دوه کاله پاتې دي، خو د سپینې ماڼۍ د راتلونکې سیالۍ لومړنۍ سیاسي هڅې لا له اوسه د دغه هېواد په سیاسي فضا کې لیدل کېږي.
د سياېناېن د راپور له مخې، د ډیموکرات او جمهوريپال ګوند یو شمېر احتمالي څېرې د ۲۰۲۶ کال منځمهاله ټاکنو ته په نږدې کېدو سره داسې فعالیتونه پیل کړي چې ښايي په راتلونکو ولسمشریزو سیالیو کې د هغوی سیاسي دریځونه روښانه کړي.
د راپور له مخې، ځینې سیاستوال هغو ایالتونو ته سفرونه کوي چې هم د ۲۰۲۶ کال په منځمهاله ټاکنو او هم د ولسمشریزو مقدماتي سیالیو په بهیر کې اهمیت لري. ځینې نور د کورنیو او بهرنیو سیاستونو پر مهمو موضوعاتو خپل دریځونه څرګندوي، په داسې حال کې چې یو شمېر یې د احتمالي نوماندۍ په اړه لا څرګندې خبرې کوي او ځینې نور لا د سیاسي فضا او احتمالي ملاتړ کچه ارزوي.
د ډیموکراتانو په منځ کې، د امریکا پخوانۍ مرستیاله ولسمشره کامالا هریس په وروستیو اوونیو کې د ۲۰۲۶ کال منځمهاله ټاکنو لپاره د خپل ګوند د نوماندانو د ملاتړ فعالیتونه زیات کړي دي. هغې په میشیګان ایالت کې د سنا د یوه ډیموکرات نوماند ملاتړ کړی او ټاکل شوې په نوادا او جورجیا کې هم د ډیموکراتانو په انتخاباتي پروګرامونو کې ګډون وکړي.
هریس تر اوسه نه دي ویلي چې په ۲۰۲۸ کال کې به ولسمشریزو ټاکنو ته نومانده شي. هغې ویلي چې اوس مهال یې تمرکز پر ۲۰۲۶ کال منځمهاله ټاکنو دی.
په ورته وخت کې، د کالیفورنیا والي ګیوین نیوسم هم د ۲۰۲۸ کال د احتمالي نوماندۍ په اړه د هریس پرېکړې ته پام کوي. نوموړي ویلي، که هریس په سیالۍ کې داخل شي، دی به نوماند نه شي. دا دریځ ښيي چې حتی د رسمي نوماندیو له اعلان مخکې هم د ډیموکراتانو دننه سیاسي محاسبې د احتمالي نوماندانو د پرېکړو پر لوري اغېز کوي.
د ډیموکراتانو د استازو جرګې غړې الکساندریا اوکاسیو-کورټېز هم په وروستیو اوونیو کې د ۲۰۲۸ کال په ولسمشریزو ټاکنو کې د احتمالي ګډون په اړه نسبتاً څرګندې خبرې کړې دي. هغې تر اوسه خپله نوماندي نه ده اعلان کړې، خو څرګندونو یې د احتمالي ګډون موضوع بیا د رسنیو پام ته راوستې ده.
هغه تازه نظرپوښتنه چې سياېناېن پرې راپور ورکړی، ښيي چې د ډیموکراتانو دننه د احتمالي نوماندانو په اړه سیالي لا ډېره پرانیستې ده. په دې نظرپوښتنه کې کامالا هریس ۱۷ سلنه، پیت بوتیجج ۱۶ سلنه، او الکساندریا اوکاسیو-کورټېز او ګیوین نیوسم هر یوه ۱۴ سلنه ملاتړ ترلاسه کړی دی.
دا شمېرې د یوې لومړنۍ نظرپوښتنې پایلې دي او د ۲۰۲۸ کال تر ټاکنو لا ډېر وخت پاتې دی؛ له همدې امله د وروستۍ سیالۍ د پایلې وړاندوینه نه شي کولی.
د جمهوريپالو په منځ کې هم د جيډي ونس او مارکو روبیو نومونه د راتلونکو ټاکنو د احتمالي څېرو په توګه مطرح کېږي. خو د ډونالډ ټرمپ حضور لا هم د جمهوريپال ګوند د راتلونکو سیاسي محاسبو له مهمو عواملو څخه دی.
ټرمپ په خپله وروستۍ وینا کې د خپلې پاتې ولسمشرۍ مودې ته اشاره کړې او ویلي یې دي: «زه به دوه نیم کاله نور هم دلته یم.»
ټرمپ په ۲۰۲۴ کال کې بېرته سپینې ماڼۍ ته ورغی او د امریکا د اساسي قانون له مخې د درېیمې دورې لپاره د ولسمشر په توګه بیا ټاکل کېدای نه شي. له همدې امله د ۲۰۲۸ کال ټاکنې د جمهوريپال ګوند لپاره د ټرمپ د سیاسي میراث او د هغه د احتمالي ځایناستي د موضوع له بحث سره هم تړاو لري.
خو تر هغه مخکې د ۲۰۲۶ کال د نومبر منځمهاله ټاکنې ترسره کېږي. په دغو ټاکنو کې د دواړو ګوندونو د نوماندانو فعالیت، د ټرمپ له ادارې څخه د ملاتړ کچه او د دواړو ګوندونو عمومي سیاسي وضعیت کولی شي د هغو سیاستوالو پر پرېکړو اغېز وکړي چې د ۲۰۲۸ کال د احتمالي نوماندۍ په اړه فکر کوي.
هغه څه چې اوس په امریکا کې لیدل کېږي، لا د ولسمشرۍ رسمي سیالي نه ده؛ بلکې د سیاسي چمتووالي، له رایه ورکوونکو سره د اړیکو پراخولو، د ګوندي ملاتړ د کچې ارزولو او د احتمالي نوماندانو د ظرفیت د معلومولو لومړنی پړاو دی.
له همدې امله، هغه نومونه چې نن د ۲۰۲۸ کال لپاره مطرح دي، اړینه نه ده چې د راتلونکو ټاکنو وروستی نوملړ جوړ کړي. د دواړو ګوندونو مقدماتي ټاکنو ته لا ډېر وخت پاتې دی او ډېر سیاستوال ښايي په راتلونکو میاشتو او کلونو کې خپلې پرېکړې بدلې کړي.
