د امریکا د جګړې وزیر پیټ هګسېټ له افغانستانه د امریکايي ځواکونو وتل د دغه هېواد د نړیوال اعتبار لپاره یوه فاجعه بللې او د ۲۰۲۱ کال د وتلو پر مهال یې د پوځي او ستراتیژیکو ناکامیو د جدي او بې له سیاسي ملاحظاتو څېړلو غوښتنه کړې ده.
هګسېټ د نومبر پر ۹مه، د دوشنبې په ورځ، د امریکا د سمندري ځواکونو د جګړې په پوهنځي کې په یوه وینا کې وویل، د دغه هېواد پوځي روزنیز بنسټونه د وروستیو ستراتیژیکو ناکامیو، په ځانګړي ډول له افغانستانه د وتلو، له ژورې ارزونې ډډه کړې ده. د هغه په وینا، د دغو بنسټونو ځینې استادان دا موضوعات حساس یا له سیاسي پلوه جنجالي ګڼي او له څېړلو یې ډډه کوي.
هګسېټ په خپله وینا کې وویل: «پنځه کاله مخکې امریکا په کابل کې سپکه شوه او د نړۍ ټولو دښمنانو یې دا پېښه څارله.» هغه دا پوښتنه هم راپورته کړه چې ولې امریکايي لوړپوړو پوځي قوماندانانو د افغانستان د حکومت سقوط اټکل نه کړ او ولې د دغه هېواد عملیاتي پلانونه یوازې په څو ورځو کې له منځه ولاړل.
د امریکا د جګړې وزیر د کابل هوايي ډګر د تخلیې پر مهال د ابي دروازې ځانمرګي برید ته هم اشاره وکړه او ویې ویل، د عملیاتي، ستراتیژیکو او سیاسي ناکامیو په پایله کې ۱۳ امریکايي سرتېري ووژل شول. هغه ټینګار وکړ چې د امریکا پوځي پوهنځي هغو سرتېرو ته د دغه هېواد د شل کلنې جګړې په اړه د خپلو کړنو یوه رښتینې او بې له پردې ارزونه پوروړي دي چې په افغانستان کې یې خدمت کړی دی.
هګسېټ د پخواني ولسمشر جو بایډن پر ادارې هم نیوکه وکړه او له افغانستانه یې د ځواکونو د وتلو مدیریت د هغې ادارې له ناکامیو څخه وباله. نوموړي د امریکا د پخواني دفاع وزیر لوید آسټین پر کړنو هم نیوکې وکړې او د کانګرس له خوا د هغه وخت د چارواکو د حساب ورکولو څرنګوالی یې تر پوښتنې لاندې راوست.
امریکايي ځواکونه د ۲۰۲۱ کال په اګست کې، د جو بایډن د ولسمشرۍ پر مهال، له افغانستانه ووتل. د امریکايي او نړیوالو ځواکونو له وتلو سره هممهاله د افغانستان پخوانی حکومت ړنګ شو او طالبان بېرته واک ته ورسېدل.
د هګسېټ دا څرګندونې د امریکا د پوځي پوهنځیو د روزنیزو پروګرامونو د ارزونې او اصلاح په چوکاټ کې شوې دي. هغه غواړي چې دغه بنسټونه د امریکا پوځي او ستراتیژیکې ناکامۍ له سیاسي ملاحظاتو پرته وڅېړي.
