رسنیو په ترکیه کې د ایران له پولې سره نږدې د اتو کسانو د جسدونو د موندل کېدو خبر ورکړی دی. د قربانیانو هویت او د مړینې لامل یې تر اوسه په رسمي توګه نه دي اعلان شوي.
د ترکیې د رسنیو د خپرو شویو راپورونو له مخې، د دغو اتو کسانو جسدونه د دواړو هېوادونو په سرحدي سیمه کې موندل شوي دي. په تېرو ورځو کې په ځینو راپورونو کې احتمال ورکړل شوی و چې قربانیان به د افغانستان وګړي وي، خو تر اوسه دغه موضوع د رسمي چارواکو له خوا نه ده تایید شوې.
د راپورونو تر خپرېدو پورې، د جسدونو د موندل کېدو د دقیق ځای، د مړینې د وخت او هغو شرایطو په اړه چې د دې پېښې لامل شوي، نور معلومات نه دي خپاره شوي.
