فرحناز اسپد، خبریاله او د ایران انټرنشنل تلویزیون ویانده، له یوې سختې ناروغۍ وروسته د ۳۷ کلونو په عمر مړه شوې ده.
فرحناز اسپد په ۱۳۶۷ لمریز کال کې زېږېدلې وه او شاوخوا اته کاله مخکې یې له ایران انټرنشنل سره خپله دنده پیل کړې وه. هغې په دې موده کې د خبریالې او ویاندې په توګه کار کړی و.
د هغې همکارانو اسپد یوه مسلکي، زیارکښه، انساندوسته او د ایران د خلکو د ژوند د شرایطو د ښه کېدو لپاره لېواله خبریاله بللې ده.
اسپد شاوخوا دوه کاله مخکې په سرطان اخته شوې وه او له هغه وخت راهیسې یې د درملنې بهیر تعقیباوه. د ناروغۍ له امله یې په دې موده کې ونه شو کولای خپل رسنیز فعالیت ته دوام ورکړي.
ایران انټرنشنل او افغانستان انټرنشنل په جلا پیغامونو کې د هغې پر مړینه د اسپد له کورنۍ، د هغې له مېړه بهنود نورپناه، پلار، مور او خور سره خواخوږي څرګنده کړې ده.
د ایران انټرنشنل د تحریریې غړي مرتضی کاظمیان، فرحناز اسپد یوه «متین، مطالعهکوونکې، زیارکښه او مسلکي» خبریاله بللې او هغه یې مهربانه، صبوره او له نورو سره د زغم لرونکې انسان په توګه یاده کړې ده.
د ایران انټرنشنل ویاندې او د تحریریې غړې نیوشا صارمي هم د اسپد یاد تازه کړی او ویلي یې دي چې هغې څو ځله د بېرته کار ته ستنېدو او بیا د کمرې مخې ته درېدو خپله لېوالتیا څرګنده کړې وه.
صارمي لیکلي چې د کار ته د بېرته ستنېدو هیله، په حقیقت کې د هغې د خوښې ژوند ته د بېرته ستنېدو هیله وه.
د ایران انټرنشنل د تحریریې بلې غړې فرنوش فرجي هم اسپد یوه ځوانه، مسلکي او هڅانده خبریاله او ویانده بللې او د کار په چاپېریال کې یې د هغې د زغم او ارامۍ یادونه کړې ده.
فرجي له اسپد سره د نوروز د یوه ډیجیټلي پروګرام د ګډ کار یوه خاطره هم بیان کړې او ویلي یې دي چې هغې حتی په سختو او له فشار ډکو کاري شرایطو کې، د یوې ویډیو د بیا ثبتولو پر مهال هم هېڅکله اعتراض نه کاوه او په خپله همېشنۍ موسکا یې همکارۍ ته دوام ورکاوه.
د فرحناز اسپد مړینې د هغې د همکارانو او رسنیزو نږدې کسانو غبرګونونه راپارولي دي. هغوی له اسپد څخه نه یوازې د یوې مسلکي خبریالې او ویاندې په توګه، بلکې د یوې ارامې، مهربانې، صبورې او خوږې انسانې په توګه یادونه کړې ده.
