د سمیع سادات په مشرۍ د افغانستان متحدې جبهې اعلان کړی چې د طالبانو او هغو ډلو پر ضد یې چې «نورې ترهګرې ډلې» یې بولي، خپل پوځي عملیات پیل کړي دي.
دې جبهې د شنبې په ورځ، د اسد په لسمه، په خپره شوې اعلامیه کې ویلي چې دغه عملیات د «افغانستان د آزادۍ مأموریت» په چوکاټ کې او خلکو ته د واک د بېرته سپارلو په هدف پیل شوي دي.
په اعلامیه کې راغلي چې متحده جبهه ځان د افغانستان د اساسي قانون، درې رنګه ملي بیرغ او ملي ارزښتونو وارثه ګڼي او د خلکو د ارادې د تحقق، د عدالت د تأمین او د طالبانو پر ضد د مبارزې لپاره به خپلو فعالیتونو ته دوام ورکړي.
دې جبهې همدارنګه ادعا کړې چې د اسد په اتمه یې د کندهار ـ سپین بولدک پر لویه لاره د طالبانو ځواکونه په نښه کړي دي. په همدې تړاو په ټولنیزو رسنیو کې یوه ویډیو هم خپره شوې چې ویل کېږي د همدې برید اړوند ده، خو تلویزیون نیمروز نه شي کولای د دې ادعا او د ویډیو د محتوا کرهوالی په خپلواکه توګه تأیید کړي.
طالبانو تر اوسه د دغو ادعاوو په اړه رسمي غبرګون نه دی ښودلی.
سمیع سادات د افغانستان د پخواني جمهوري نظام د پوځ له لوړپوړو قوماندانانو څخه و او په هلمند کې د ۲۱۵ میوند قول اردو وروستی قوماندان پاتې شوی و. د هغه په مشرۍ متحده جبهه د ۱۴۰۲ کال د میزان په میاشت کې په متحده ایالاتو کې جوړه شوه او تر دې وړاندې یې تر ډېره سیاسي فعالیتونه کول.
د دغې جبهې له خوا د پوځي عملیاتو د پیل اعلان په داسې حال کې کېږي چې په وروستیو اوونیو کې د طالبانو د مخالفو وسلهوالو ډلو بریدونه د افغانستان په بېلابېلو سیمو کې زیات شوي دي. تر دې وړاندې د «سپاهیان میهن» په نوم نوې جوړې شوې جبهې د بدخشان د یفتل پایین ولسوالۍ د برید مسئولیت منلی و او د افغانستان آزادۍ جبهې هم د بدخشان د زیباک ولسوالۍ په جګړو کې د طالبانو پر ضد د عملیاتو د دوام خبر ورکړی و.
