د طالبانو د سرحدونو، قومونو او قبایلو وزارت د سرحدي څېړنو مرستیال عنایت الله شجاع ویلي، یوه ورځ به د افغانستان خلک نړۍ وژغوري او هغه مهال به هېڅ ځواک د افغانانو پر وړاندې د دښمنۍ جرئت ونه لري.
شجاع دغه څرګندونې د چهارشنبې په ورځ، د لړم په ۲۰مه، په پروان ولایت کې د یوې ولسي غونډې پر مهال کړې دي. د طالبانو د سرحدونو وزارت په خپل راپور کې ویلي، دا غونډه د «اسلامي نظام تر سیوري لاندې د شریعت پلي کول او له خلکو سره همغږي» تر سرلیک لاندې جوړه شوې وه.
د دغه وزارت د راپور له مخې، شجاع ویلي، هغه کسان چې له «کافرانو» سره یې همکاري کوله او خلک یې د هغوی غلامۍ ته هڅول، د خلکو له غبرګون سره مخ شول. نوموړي له کورنیو غوښتي چې خپل ماشومان زده کړو ته وهڅوي، څو وکولای شي په بېلابېلو برخو کې له نړۍ سره سیالي وکړي.
خو د زده کړو په اړه د شجاع دا غوښتنه په داسې حال کې مطرح کېږي چې طالبان د ۲۰۲۱ کال په اګست کې واک ته تر ستنېدو وروسته، د نجونو او ښځو پر زده کړو پراخ محدودیتونه لګولي دي. په افغانستان کې نجونې له شپږم ټولګي پورته زده کړو ته اجازه نه لري او ښځې هم پوهنتونونو ته له تګ منع شوې دي.
د دغو محدودیتونو له امله د هېواد د نفوس نږدې نیمایي برخه له لوړو زده کړو او د علمي او مسلکي سیالۍ له فرصتونو بې برخې شوې ده. دا وضعیت د طالبانو د چارواکو د نړیوالې سیالۍ او د زده کړو د هڅونې له څرګندونو سره څرګند تضاد لري.
په همدې غونډه کې د طالبانو د سرحدونو وزارت د جرګو او قبایلي چارو د همغږۍ رئیس محمد آجان رهبر ویلي، د هغه په وینا، د جګړې په ډګر کې د دښمن له ماتې وروسته، اوس د «فکري جګړې» پر وړاندې د مبارزې هڅې روانې دي. هغه له خلکو غوښتي چې د هغه څه پر وړاندې هوښیار واوسي چې دی یې د دښمن تبلیغات بولي.
طالبان خپله شل کلنه جګړه، چې د کورنیو ځواکونو او د امریکا په مشرۍ د نړیوال ائتلاف پر وړاندې یې کړې وه، بریا بولي. دغه جګړه د ۲۰۲۱ کال په اګست کې د جمهوري نظام له سقوط او د امریکايي ځواکونو له وتلو سره پای ته ورسېده.
خو د څو لسیزو جګړو سیاسي، اقتصادي او ټولنیزې پایلې لا هم د افغانستان له مهمو ننګونو څخه دي؛ هغه ننګونې چې د زده کړو محدودیتونه، اقتصادي ستونزې او د خلکو د ګډون کمښت یې د حل پر وړاندې خنډونه جوړوي.
