زهره وندا د یوې سیالۍ له بهیر وروسته، د ۱۴۰۵ او ۱۴۰۶ کلونو لپاره په ملګرو ملتونو کې د افغان ځوانانو د استازې په توګه ټاکل شوې ده. د «افغانان د پرمختللي فکر لپاره» بنسټ وايي، نوموړې به په نړیوالو غونډو کې د افغان ځوانانو، په ځانګړي ډول د ځوانو ښځو، نظرونه، غوښتنې او اندېښنې منعکسوي.
د دغه بنسټ د اعلامیې له مخې، د سیالۍ پایلې د جمعې په ورځ، د لړم په ۱۵مه، د ژنیو په ملګرو ملتونو ماڼۍ کې په یوه رسمي مراسمو کې اعلان شوې. په وروستي پړاو کې څلور نوماندانو، چې له سلګونو غوښتونکو څخه غوره شوي وو، د پنځو دقیقو په ویناوو کې خپل پروګرامونه او لیدلوري وړاندې کړل او د ارزونې پلاوي پوښتنو ته یې ځوابونه وویل.
د سیالۍ د ارزونې په پلاوي کې د افغانستان د عامې روغتیا پخوانۍ وزیره ثریا دلیل، د بشري حقونو د څار سازمان د ښځو د حقونو د برخې مرستیاله هیدر بار، د ښوونیزو سیاستونو متخصصه عاطفه طیب، د «افغانستان لپاره د زده کړې پل» بنسټ اجرائیوي مشره حمیرا رضایي او د سیالۍ د جوړوونکي بنسټ اجرائیوي مشر اجمل رامیار شامل وو.
د «افغانان د پرمختللي فکر لپاره» بنسټ ویلي، وندا به د خپل ماموریت پر مهال په افغانستان دننه او بهر له ځوانانو سره اړیکې ساتي او د هغوی غوښتنې به له ملګرو ملتونو او اروپايي ټولنې سره په تعامل کې مطرح کوي. د نجونو د زده کړې او د ښځو د حقونو دفاع یې د کاري لومړیتوبونو په توګه یادې کړې دي.
په ملګرو ملتونو کې د افغان ځوانانو د استازي پروګرام په ۱۳۹۷ لمریز کال کې د همدې بنسټ له خوا جوړ شوی، څو د افغانستان د ځوان نسل غوښتنې نړیوالو بحثونو ته ورسوي.
د زهره وندا ټاکنه په داسې حال کې کېږي چې طالبان واک ته تر ستنېدو وروسته د نجونو پر زده کړو، د ښځو پر کار او په ټولنیزو او عامه چارو کې د هغوی پر ګډون پراخ محدودیتونه لګولي دي. په نړیوالو غونډو کې د افغان ښځو او نجونو د حقونو او غوښتنو مطرح کول لا هم د افغانستان د بشري حقونو له مهمو موضوعاتو څخه ګڼل کېږي.
