جبهه متحد افغانستان وايي، په تېرو ۱۰۰ ورځو کې یې د افغانستان په ۲۳ ولایتونو کې د طالبانو پر ضد ۱۱۶ پوځي عملیات ترسره کړي چې په پایله کې یې لږ تر لږه ۱۵۳ طالب جنګیالي وژل شوي او ۸۹ نور ټپیان شوي دي. دا شمېرې د یادې جبهې له خوا اعلان شوې، خو خپلواک تایید یې نه دی شوی.
د دې جبهې مشر سمیع سادات د یکشنبې په ورځ، د لړم په ۱۷مه، د عملیاتو د سل ورځنۍ دورې په مناسبت په یوه ویډیويي پیغام کې وویل، له ترسره شویو عملیاتو څخه ۱۱ یې تعرضي او پاتې نور یې هدفمند وو. د هغه په وینا، د هدفمند عملیاتو ۶۰ سلنه په سوېل لوېدیځ زون کې، په ځانګړي ډول په هغو سیمو کې ترسره شوي چې نوموړي د طالبانو سیاسي او پوځي مرکزونه وبلل. سادات زیاته کړه چې په دې موده کې د جبهه متحد درې غړي هم وژل شوي دي.
سادات وویل، په سوېل لوېدیځ کې د عملیاتو تمرکز د کندهار په مرکز کې د طالبانو د مشرتابه د کمزوري کولو لپاره و. هغه ادعا وکړه چې جبهه متحد په ټول افغانستان کې حضور لري او په تېرو سل ورځو کې یې له ځوانو مبارزینو او قومي مشرانو سره اړیکې پیاوړې کړې دي.
د جبهې مشر د پوځي عملیاتو ترڅنګ د سیاسي فعالیتونو د دوام خبر هم ورکړ. نوموړي وویل، د یووالي د پیاوړتیا لپاره یې له یو شمېر افغان سیاسي څېرو سره غونډې کړې دي. هغه همداراز ادعا وکړه چې د جبهې د ځواکونو شمېر زیات شوی او د طالبانو په مشرتابه کې اختلافات رامنځته شوي دي؛ خو د دغو ادعاوو په اړه یې خپلواک شواهد او جزئیات نه دي وړاندې کړي.
سادات په خپلو څرګندونو کې روسیه هم له طالبانو سره په پوځي او استخباراتي همکارۍ تورنه کړه. د هغه په وینا، دا همکاري د وسلو ترمیم او د بلاروس له لارې د روزنې برابرول هم رانغاړي. نوموړي وویل، جبهه متحد د دغو اقداماتو په اعتراض کې روسیې ته لیک استولی او د طالبانو د پوځي ملاتړ د بندېدو غوښتنه یې کړې ده.
جبهه متحد افغانستان، چې مشري یې د افغان پوځ د ځانګړو ځواکونو پخوانی قوماندان سمیع سادات کوي، د زمري په لسمه د طالبانو او نورو ډلو پر ضد د پوځي عملیاتو د پیل اعلان کړی و. دې جبهې دغه اقدام د «افغانستان د ازادۍ ماموریت» یوه برخه بللې وه.
له هغه وخت راهیسې، جبهې په بېلابېلو ولایتونو، په ځانګړي ډول هلمند، کندهار او نیمروز کې د بریدونو راپورونه خپاره کړي دي. د تلې په ۲۲مه یې هم ادعا کړې وه چې په کندهار کې یې له طالبانو سره په نښته کې د دې ډلې درې غړي وژلي دي؛ خو د کندهار د طالبانو د امنیې قوماندانۍ ویلي وو چې په هماغه نښته کې دوه مخالف وسله وال وژل شوي دي.
د جبهه متحد د عملیاتو، د مرګ ژوبلې د شمېرو او د روسیې د پوځي همکارۍ ادعاوې په خپلواکه توګه نه دي تایید شوې.
