د افغانستان د ژغورنې ملي شورا د رهبرۍ شورا دوره يي مشر عمر داوودزي له امریکا غوښتي چې له خپل نړیوال نفوذ څخه په افغانستان کې د ملي پخلاینې، ثبات او تلپاتې سولې د ټینګښت لپاره کار واخلي. هغه ویلي چې د امریکا لویوالی یوازې په اقتصادي او پوځي ځواک پورې نه دی تړلی، بلکې په نړۍ کې د سولې په رامنځته کولو کې یې رول هم ارزښت لري.
داوودزي د جمعې په ورځ، د لړم په ۱۵مه، په ټولنیزه شبکه اېکس کې په یوه لیکنه کې د امریکا منځمهاله ټاکنو ته په اشارې ویلي چې دغو ټاکنو یو ځل بیا د دغه هېواد د ډیموکراتیک نظام وړتیا وښوده چې د خلکو د ارادې له مخې ځان اصلاح، نوی او له حالاتو سره عیار کړي.
د هغه په وینا، د سیاسي قطب بندۍ، کورنیو اختلافونو او د ډیموکراتیکو بنسټونو پر وړاندې د ننګونو سربېره، امریکايي وګړو یو ځل بیا د ډیموکراتیک حساب ورکولو او د ګډ ولسي غږ پر اهمیت ټینګار وکړ.
د افغانستان پخواني چارواکي زیاته کړې چې د بنسټونو پیاوړتیا، د ډیموکراتیکو دودونو خوځښت او د هېواد د راتلونکي په ټاکلو کې د خلکو ونډه، د اقتصادي هوساینې، پوځي ځواک او نړیوال نفوذ ترڅنګ، د امریکا د ځواک اساسي عوامل دي.
داوودزي ویلي چې د امریکا خلک هم د نورو هېوادونو د وګړو په څېر په سوله، امنیت، کرامت او هوساینې کې ژوند کول غواړي او غوره ګڼي چې اختلافونه د جګړې او مقابلې پر ځای د ډیپلوماسۍ له لارې حل شي.
نوموړي په افغانستان کې د څه باندې څلورو لسیزو جګړو ته په اشارې ویلي چې د اوږدو شخړو تجربې د دغه هېواد خلکو ته د سولې ارزښت تر بل هر څه ډېر څرګند کړی دی.
داوودزي ټینګار کړی چې افغانان له امریکا تمه لري چې له خپل پراخ نړیوال نفوذ څخه نه یوازې د خپلو ملي ګټو د ساتنې لپاره، بلکې په افغانستان کې د ملي پخلاینې، ثبات او تلپاتې سولې د ټینګښت لپاره هم کار واخلي.
د هغه څرګندونې د افغانستان د سولې په بهیر کې د امریکا د احتمالي رول په اړه یوه سیاسي غوښتنه ده؛ خو په لیکنه کې د واشنګټن له لوري د کوم نوي عملي اقدام یا مشخص پلان اعلان نه دی شوی.
