د هرات ولایت د اطلاعاتو او کلتور ریاست، چې د طالبانو تر ادارې لاندې فعالیت کوي، د ښځو د پوښښ او ټولنیز حضور په اړه تازه خبرپاڼه خپره کړې ده.
دغه خبرپاڼه د چهارشنبې په ورځ، د جوزا په ۲۰مه، د باختر خبري اژانس له لارې خپره شوې او پکې د ښځو د حجاب او په عامه ځایونو کې د حضور په اړه د طالبانو دریځ بیا تکرار شوی دی.
د خبرپاڼې له مخې، د ښځو لپاره د ټول بدن پټول لازمي بلل شوي او د مخ پټول هم اړین ګڼل شوي دي. همداراز په اعلامیه کې د تنګو او نازکو جامو د نه اغوستلو سپارښتنه شوې ده.
په دغه لارښود کې د ښځو د عامه حضور په اړه هم محدودیتونه یاد شوي دي. طالبان ټینګار کوي چې ښځې باید له اړتیا پرته له کورونو ونه وځي او د نامحرمو نارینه وو او ښځو ترمنځ اړیکې باید محدودې وي.
اعلامیه همداراز د ښځو د غږ اورېدل په ځینو چاپېریالونو کې د محدودیت وړ موضوع بللې او د نامحرمو نارینه وو له خوا ښځو ته د کتلو د مخنیوي یادونه پکې شوې ده.
دغه لارښوونې د طالبانو د امر بالمعروف او نهی عن المنکر د قانون د دیارلسمې مادې پر بنسټ خپرې شوې دي؛ هغه قانون چې د تصویب راهیسې له پراخو کورنیو او نړیوالو نیوکو سره مخ شوی دی.
د دغې اعلامیې خپرېدل داسې مهال کېږي چې په وروستیو ورځو کې په هرات کې د ښځو د نیولو او د خلکو د اعتراضونو راپورونه خپاره شوي دي.
ځايي سرچینې وایي چې د جبرئیل ښارګوټي له اعتراضونو وروسته طالبانو په هرات کې امنیتي تدابیر زیات کړي او په بېلابېلو سیمو کې یې د څارنې او کنټرول کچه لوړه کړې ده.
طالب چارواکو تر اوسه په رسمي ډول نه دي ویلي چې دغه تازه خبرپاڼه له وروستیو اعتراضونو او پېښو سره مستقیم تړاو لري که نه، خو د هغې خپرېدل د ټولنیزو کړکېچونو او د ښځو پر وړاندې د محدودیتونو د زیاتېدو له راپورونو سره هممهاله ترسره شوي دي.
د دې موضوع مهم اړخ دا دی چې د ښځو د حقونو او ټولنیز حضور مسئله لا هم د طالبانو او نړیوالې ټولنې ترمنځ د اختلاف له مهمو موضوعاتو څخه ګڼل کېږي، او هر نوی محدودیت د افغانستان د ښځو د وضعیت په اړه بحثونه لا پسې تودوي.
