د خراسان ورځپاڼې د راپور له مخې، پېښه شاوخوا دوه میاشتې مخکې شوې وه، خو د قضیې جزئیات د دوشنبې په ورځ، د اکتوبر پر ۱۲مه، په ایراني رسنیو کې خپاره شول.
د راپورونو له مخې، شریفې خپل یو ملګري ته، چې د هغې له خپلوانو څخه هم و، خپل انځور لېږلی و. کله چې مېړه یې د دغه کس پیغام ولید چې په کې یې د شریفې د انځور ستاینه کړې وه، غوسه شو او خپله مېرمن یې په سوکونو، لغتو او یوه کلک څیز ووهله.
د خپرو شویو معلوماتو له مخې، شریفه د وهلو له امله بېهوښه شوه. مېړه یې د یوې بلې ښځې په مرسته هغه د درملنې یوه مرکز ته ولېږدوله. وروسته شریفه د مشهد هاشمينژاد روغتون ته انتقال شوه، خو له څو ورځو بستر کېدو وروسته یې ساه ورکړه.
د ایران عدلي طب ویلي چې د شریفې پر سر د یوه کلک څیز ګوزار د هغې د مغزي مړینې لامل شوی و. د جسد معاینې د بدن په بېلابېلو برخو، په ځانګړي ډول پښو کې، پراخ شینوالي او د وهلو نښې هم څرګندې کړې. د ایراني رسنیو د راپور له مخې، د دغو نښو یوه برخه د قمچینې د ګوزارونو له امله رامنځته شوې وه.
ایراني رسنیو راپور ورکړی چې شریفه او مېړه یې دواړه د افغانستان وګړي وو او د تره لور او د تره زوی یې یو له بل سره واده کړی و. دوی څه موده مخکې په ناقانونه توګه ایران ته داخل شوي او په مشهد کې یې یو کور په کرایه نیولی و.
د راپورونو له مخې، پولیسو تورن کس د وږي پر دویمه د مشهد په شهید رجایي ښارګوټي کې پېژندلی او نیولی و. دغه کس د څېړنو پر مهال ویلي چې په ټولنیزو رسنیو کې د خپلې مېرمنې د انځور خپرېدو او د نورو کسانو غبرګونونو هغه په غوسه کړی و.
له جرم سره د تړلې پېښې له بیا تمثیل وروسته، تورن کس د قاضي په امر زندان ته لېږدول شوی دی. د قضیې قضايي څېړنې لا هم روانې دي او د محکمې د وروستۍ پرېکړې جزئیات نه دي اعلان شوي.
د شریفې مړینه یو ځل بیا د ښځو او نجونو پر وړاندې د کورني تاوتریخوالي، په ځانګړي ډول د کمعمره نجونو د خوندیتوب، مسئله راپورته کوي. د تورن کس د جزايي مسؤلیت او د قضیې وروستۍ پایلې په اړه پرېکړه به د قانوني بهیر له بشپړېدو وروسته روښانه شي.
