د اسرائیلو لومړي وزیر بنیامین نتانیاهو د ملګرو ملتونو د عمومي اسامبلې په ۸۱مه غونډه کې د ترکیې پر ولسمشر رجب طیب اردوغان سختې لفظي نیوکې وکړې او هغه یې «مستبد» وباله.
نتانیاهو اردوغان تورن کړ چې د حماس له مشرانو کوربهتوب کوي، زرګونه کرد ملکي وګړي یې وژلي او خبریالان او سیاسي مخالفین یې زنداني کړي دي. دغه څرګندونې د اسرائیلو د سیاسي دریځونو په چوکاټ کې مطرح شوې او د ترکیې د کورني او بهرني سیاست په اړه د نتانیاهو ادعاوې پکې شاملې وې.
نتانیاهو ترکیه هم په دې تورنه کړه چې د ده په وینا د «یهود ضد دروغو» په خپرولو کې ورسره یوځای شوې ده. هغه پر اردوغان د ارمنیانو د نسلوژنې د نه منلو تور هم ولګاوه او د قبرس په اړه یې وویل چې ترکیه د دې ټاپو شمالي برخه په ناقانونه توګه تر خپل کنټرول لاندې ساتي.
د ترکیې د خبریالانو او سیاسي مخالفینو پر وړاندې د حکومت د چلند په اړه نتانیاهو وویل چې اردوغان خبریالان او مخالف سیاسي مشران زنداني کوي او ادعا یې وکړه چې نوموړی په دې برخه کې «نړیوال ریکارډ» لري.
نتانیاهو د یونان او سوریې په اړه د ترکیې پر سیاستونو هم نیوکه وکړه او ادعا یې وکړه چې اردوغان هڅه کوي په سوریه کې د ترکیې نفوذ پراخ کړي.
د نتانیاهو د وینا یوه برخه بیتالمقدس ته ځانګړې شوې وه. هغه د اردوغان د څرګندونو په غبرګون کې وویل چې بیتالمقدس د اسرائیلو هېواد، ښار او «تلپاتې پلازمېنه» ده.
دا څرګندونې په داسې حال کې وشوې چې اردوغان هم د ملګرو ملتونو په عمومي اسامبلۍ کې د اسرائیلو پر پوځي عملیاتو په غزه کې سختې نیوکې کړې او د جګړې د پای ته رسولو لپاره یې د نړیوال فشار غوښتنه وکړه. اردوغان همداراز د هغو هېوادونو د شمېر له زیاتېدو ملاتړ وکړ چې د فلسطین دولت په رسمیت پېژني.
ترکیه د غزې د جګړې پر وړاندې له سختو منتقدانو څخه ده او په ځینو مواردو کې یې د اسرائیلو پوځي عملیات نسلوژنه بللي دي؛ اسرائیل دا تور ردوي.
د غزې جګړې، د فلسطین مسئلې او د انقرې د حماس سره د اړیکو له امله د اسرائیلو او ترکیې ترمنځ اړیکې په وروستیو کلونو کې له جدي سیاسي او دیپلوماتیکو اختلافونو سره مخ شوې دي.
په ملګرو ملتونو کې د نتانیاهو او اردوغان څرګندونې ښيي چې د غزې جګړه یوازې د دواړو هېوادونو ترمنځ د اختلاف موضوع نه ده پاتې شوې، بلکې د سیمې د نفوذ، فلسطین، بیتالمقدس او د منځني ختیځ د راتلونکي پر سر د پراخې سیاسي او دیپلوماتیکې مقابلې یوه برخه هم ګرځېدلې ده.
