د افغانستان یو وګړی په متحده ایالاتو کې د ماشومانو پر وړاندې د جنسي تېري، جنسي ځورونې او ناوړه ګټې اخیستنې، او د ماشومانو د جنسي محتوا د تولید او ساتلو په قضیه کې له مجرم پېژندل کېدو وروسته په ۳۵ کاله بند محکوم شوی دی.
د ټکساس د شمالي سیمې د څارنوالۍ دفتر ویلي چې د دغه کس نوم بادشاه ساهي دی او نوموړی په ۲۰۲۱ کال کې د افغانستان د تخلیې پر مهال متحده ایالاتو ته داخل شوی و.
د محکمې د اسنادو له مخې، ساهي له یوې ۱۴ کلنې نجلۍ سره تر اړیکې وروسته هغه د فورني ښار له خپل کور مخې ته په موټر کې پورته کوله او بېلابېلو ځایونو ته یې وړله. د قضیې پلټونکو ویلي چې په دغو ځایونو کې پر دې نجلۍ جنسي تېری شوی دی.
د قضايي اسنادو له مخې، ساهي په ټکساس کې له یوې ۱۵ کلنې نجلۍ سره هم اړیکه لرله. د څارنوالۍ د معلوماتو له مخې، هغه د دې نجلۍ د اوسېدو ځای ته تللی او هلته یې پر هغې جنسي تېری کړی او د پېښې ویډیو یې هم ثبت کړې ده.
د ساهي له نیول کېدو وروسته د هغه د ګرځنده ټیلیفون پلټنې د ماشومانو د جنسي ناوړه ګټې اخیستنې اړوند ګڼ شمېر انځورونه او ویډیوګانې هم موندلې دي. د څارنوالۍ په وینا، په دغو مواردو کې د یوه نابالغ ماشوم جنسي انځورونه او له کم عمره کسانو سره آنلاین اړیکې هم شاملې وې.
د څارنوالۍ دفتر ویلي چې ساهي لږ تر لږه په یوه قضیه کې د روبلاکس آنلاین لوبې له لارې یوه ۱۰ کلنه نجلۍ دې ته اړ کړې وه چې جنسي محتوا جوړه او ورته ولېږي.
ساهي د روان کال د فبرورۍ په ۲۸مه نیول شوی و او د اپرېل په میاشت کې یې پر ځان لګېدلي تورونه منلي وو. د محکمې له خوا د هغه د ۳۵ کلن بند حکم د سپټمبر په ۲۹مه صادر شو.
د ټکساس د شمالي سیمې د متحده ایالاتو څارنوال رایان ری بولډ ویلي چې دغه حکم د ماشومانو پر وړاندې جنسي جرمونو کوونکو ته یو څرګند پیغام دی او د ماشومانو د ساتنې لپاره یې د څارنوالۍ پر ژمنتیا ټینګار کړی دی.
په دالاس کې د کورني امنیت د تحقیقاتو ادارې د ځانګړو استازو سرپرست انټوین جونز هم ساهي د ماشومانو پر وړاندې یو خطرناک جنسي مجرم بللی او متحده ایالاتو ته د هغه د ۲۰۲۱ کال د تخلیې پر مهال د داخلېدو په اړه یې څرګندونې کړې دي.
د دې قضیې جزئیات د ټکساس د شمالي سیمې د څارنوالۍ د اعلامیې او د محکمې له اسنادو څخه اخیستل شوي دي.
