پاکستان وايي، سره له دې چې د ایران له ملاتړه برخمنو حوثیانو پر سعودي عربستان وروستي بریدونه کړي، تر اوسه د مکې د دفاعي تړون له مخې د اسلاماباد د پوځي اقدام په اړه هېڅ خبرې نه دي شوې.
د پاکستان د بهرنیو چارو وزارت ویاند سجاد حیدر خان د پنجشنبې په ورځ په یوه خبري غونډه کې وویل: «اوس مهال داسې موضوع مطرح نه ده. کله چې یې وخت راشي، د تړون له مخې به عمل وکړو.»
پاکستان، سعودي عربستان او ترکیې تېره میاشت په مکه کې یو ګډ دفاعي تړون لاسلیک کړ. د دغه تړون له مخې، پر هر یوه غړي وسلهوال برید پر ټولو غړو د برید په توګه ګڼل کېږي.
د پاکستان د بهرنیو چارو وزارت د ویاند څرګندونې وروسته له هغې کېږي چې حوثیانو پر سعودي ښارونو او د انرژۍ پر تاسیساتو بریدونه زیات کړي دي. دغو بریدونو د سیمهییزو شخړو د پراخېدو او د ایران او د هغه د سیالانو ترمنځ د روان کړکېچ د نورو جبهاتو د پرانیستل کېدو اندېښنې زیاتې کړې دي.
اسلاماباد پر سعودي عربستان د حوثیانو بریدونه غندلي، خو تر اوسه یې د مکې د دفاعي تړون له مخې د خپلو ژمنو د عملي کولو څرنګوالي په اړه جزئیات نه دي ورکړي.
تر دې مخکې رویټرز د باخبره سرچینو په حواله راپور ورکړی و چې پاکستان ایران ته خبرداری ورکړی چې په یمن کې دې حوثیان له سعودي عربستان سره د بریدونو له دوام څخه راوګرځوي.
دا دریځ ښيي چې اسلاماباد هڅه کوي، مخکې له دې چې نوی دفاعي تړون په مستقیمه پوځي نښته بدل شي، پر تهران د دیپلوماتیک فشار له لارې د حوثیانو د بریدونو د مهارولو لاره وکاروي.
پاکستان هممهاله هڅه کوي چې د امریکا او ایران ترمنځ په روانه شخړه کې د منځګړي رول ولوبوي. په مستقیم ډول پوځي ښکېلتیا کولای شي د اسلاماباد دا هڅې کمزورې کړي او پاکستان په یو وخت کې له ایران سره د اړیکو له کړکېچ او د منځني ختیځ له پراخ امنیتي بحران سره مخ کړي.
له بلې خوا، د سعودي عربستان پر انرژۍ تاسیساتو د بریدونو دوام کولای شي د پاکستان، سعودي عربستان او ایران له درېاړخیزو اړیکو ډېرې پراخې پایلې ولري. د سیمې د انرژۍ پر تاسیساتو هر ډول پراخ اختلال، د نړۍ د انرژۍ په برابرولو کې د فارس خلیج د مهم رول له امله، د نړیوالو بازارونو او د انرژۍ د خوندي رسولو په اړه اندېښنې زیاتولای شي.
د پاکستان د بهرنیو چارو وزارت ویاند همداراز ویلي چې اوس مهال د مکې دفاعي تړون ته د نورو هېوادونو د ورګډېدو کوم پلان نشته.
په دې توګه، د اسلاماباد اوسنی دریځ د ژمنې ساتلو او له سمدستي جګړهییزې ښکېلتیا څخه د ډډې کولو ترمنځ یو ډول توازن ښکاري. پاکستان له یوې خوا نه غواړي له سعودي عربستان سره د دفاعي تړون اعتبار کمزوری کړي، خو له بلې خوا، د امریکا او ایران ترمنځ د منځګړیتوب د هڅو له امله نه غواړي د کړکېچ په لومړي پړاو کې مستقیم پوځي اقدام وکړي.
له همدې امله، د پاکستان په رسمي دریځ کې د «کله چې یې وخت راشي» عبارت ښايي دا معنا ولري چې اسلاماباد د پوځي اقدام امکان نه ردوي، خو په عین حال کې ځان د سمدستي پوځي مداخلې لپاره هم نه تړي.
