د طالبانو د دفاع وزارت یو پلاوی د اسیا له مهمو امنیتي او دفاعي ناستو څخه د دیارلسم شیانګشان فورم په موخه چین ته تللی دی؛ هغه ناسته چې د بېلابېلو هېوادونو لوړپوړي پوځي او دفاعي چارواکي پکې ګډون کوي.
د طالبانو د دفاع وزارت لوی مفتش لطیفالله حکیمي د شنبې په ورځ، د وږي په ۲۱مه، ویلي چې د دغه پلاوي مشري دی کوي.
د حکیمي په وینا، د طالبانو استازي به په غونډه کې وینا وکړي او د فورم په بېلابېلو پروګرامونو کې به ګډون ولري. هغه زیاته کړې چې د طالبانو پلاوی به د بېلابېلو هېوادونو له استازو سره هم وګوري او د دواړو لورو د ګډو علاقې وړ موضوعاتو په اړه به خبرې وکړي.
د شیانګشان دیارلسم فورم د وږي له ۲۴مې تر ۲۶مې پورې د بېجینګ په نړیوال کنفرانس مرکز کې جوړېږي. دغه فورم په ۲۰۰۶ کال کې د چین په نوښت رامنځته شو او د امنیتي او دفاعي موضوعاتو په اړه د نړیوالو خبرو اترو له مهمو ناستو څخه ګڼل کېږي.
شیانګشان په لومړیو کې تر ډېره د امنیتي خبرو اترو لپاره جوړ شوی و، خو په ۲۰۱۴ کال کې د فورم کچې ته لوړ شو. له هغه وروسته د بېلابېلو هېوادونو دفاع وزیرانو او لوړپوړو پلاوو، د چین او روسیې نږدې شریکانو او ان د ناټو استازو هم پکې ګډون کړی دی.
په داسې یوه ناسته کې د طالبانو د دفاع وزارت د پلاوي ګډون د بهرنیو اړیکو له پلوه مهم بلل کېږي؛ ځکه طالبان لا هم د نړیوالې رسمي پېژندنې له جدي ننګونې سره مخ دي. خو په سیمهییزو امنیتي ناستو کې د هغوی ګډون ښيي چې چین او طالبان هڅه کوي په دفاعي او امنیتي برخو کې خپل رسمي تماسونه پراخ کړي.
له بلې خوا، د طالبانو د پلاوي احتمالي لیدنې له بېلابېلو هېوادونو سره کولی شي د دې ډلې لپاره له سیمهییزو لورو سره د اړیکو د پراخولو بله زمینه برابره کړي. خو په یوه نړیوال فورم کې ګډون په خپله د طالبانو د رسمي پېژندنې معنا نه لري؛ د دې سفر سیاسي ارزښت به تر ډېره د ترسره کېدونکو لیدنو، بحثونو او احتمالي هوکړو له کچې سره تړاو ولري.
