په تېرو درېیو اوونیو کې طالبانو په افغانستان کې د تحریک طالبان پاکستان پر وړاندې فشار زیات کړی او د ختیځ او سوېل له څو سرچینو سره سم، په دې موده کې شاوخوا ۲۰ مشران او افغان ملاتړي نیول شوي دي.
د نیمروز تلویزیون ته د رسېدلو معلوماتو له مخې، د تحریک طالبان پاکستان غړي او له دې ډلې سره تړلي کسان په کابل، خوست، پکتیکا، کونړ، غزني، میدان وردګ، کندهار او ارزګان ولایتونو کې نیول شوي دي.
په سوېلي وزیرستان کې یوې سرچینې، چې د دې ډلې د قوماندانانو د نیول کېدو بهیر له نږدې څاري، نیمروز ته ویلي چې په نیول شویو کسانو کې شیر زمان اکا، د تحریک طالبان پاکستان له لوړپوړو قوماندانانو څخه، مولوي بدري، د دې ډلې د اقتصادي کمېسیون پخوانی مشر، پیرزمان، د بلوچستان د برخې له مسؤلینو څخه، حاجي حسین، په پکتیکا کې د دې ډلې قوماندان چې په «حاجي کلان» مشهور دی، او همداراز اخلاص یار او مخلص مسید شامل دي.
د سرچینې په وینا، اخلاص یار په کابل کې اوسېده او له خپل استوګنځي نیول شوی دی.
خو د تحریک طالبان پاکستان د یوې سیمهییزې څانګې یوه مسؤل نیمروز ته ویلي چې اخلاص یار اوس په سوېلي وزیرستان کې دی او نه دی نیول شوی.
سرچینو همداراز د حافظ ګل بهادر د ډلې د ځینو سیمهییزو ډلهمشرو د نیول کېدو خبر ورکړی، چې درویش داوړ، ناصر فاتح او غازي وزیر پکې شامل دي. سرچینې وايي، د دغو کسانو ډېری د دې ډلې په لوړو پوړونو کې نه شمېرل کېږي.
وسلهوالو ته د افغانستان د پرېښودو غوښتنه
په پېښور کې د تحریک طالبان پاکستان یوه مسؤل د نیول کېدو لړۍ تایید کړې او ویلي یې دي چې په وروستیو اوونیو کې د دې ډلې «ډېر شمېر وسلهوال» نیول شوي دي.
هغه نیمروز ته ویلي چې ځینې قوماندانان ځکه نیول شوي چې «ترې غوښتل شوي وو افغانستان پرېږدي، خو هغوی لا هم هلته پاتې وو.»
د دې سرچینې په وینا، په پکتیکا کې ارګون، نوي اډې او د برمل ولسوالۍ لمن، د ګومل ولسوالۍ، په خوست کې بوريخېل او کمپ ګلان، په ګربز ولسوالۍ کې، د میدان وردګ سالاروی او همداراز په غزني، کونړ، هلمند او یو شمېر نورو سیمو کې د تحریک طالبان پاکستان له غړو سره تړلي کورونه پلټل شوي دي.
سرچینې وايي، طالبانو یو شمېر افغان وګړي هم له تحریک طالبان پاکستان سره د اړیکې او همکارۍ په شک نیولي دي.
په کندهار او ارزګان کې دوو سرچینو نیمروز ته ویلي چې په عینو مېنه، میوند او پنجوايي ولسوالیو او د کندهار ښار کې هم ځینې کورونه پلټل شوي دي.
د سرچینو په وینا، د هغو افغان طالبانو ځینې کورونه هم پلټل شوي چې د تحریک طالبان پاکستان له جوړښت سره یوځای د جګړې لپاره د خیبر پښتونخوا بېلابېلو سیمو ته تلل، او په دغو سیمو کې یو شمېر کسان نیول شوي دي.
سرچینې وايي، د کندهار ـ ارزګان پر لار ځینې د سړک غاړې هټۍ او هغه ځایونه هم تړل شوي چې د خیبر پښتونخوا له قبایلي سیمو د بېځایه شویو کورنیو لپاره پکې مرستې راټولېدې.
د سرچینو په وینا، د کیسي، البک، شاهولي، سوزنیان، چنار، کاریزګي او چنارتو په سیمو کې د تحریک طالبان پاکستان اړوند کسانو کورونه نه دي پلټل شوي.
د طالبانو تر فشار شا څه دي؟
د تحریک طالبان پاکستان پر وړاندې د طالبانو د فشار زیاتوالی په داسې وخت کې راپور کېږي چې پاکستان له اوږدې مودې راهیسې له کابل څخه د دې ډلې پر وړاندې د عملي اقدام غوښتنه کوي.
له بلې خوا، طالبانو پاکستان تورن کړی چې په افغانستان کې د دوی د مخالفو ډلو ملاتړ کوي. اسلاماباد هم په وار وار طالبان تورن کړي چې تحریک طالبان پاکستان ته یې د افغانستان له خاورې د فعالیت زمینه برابره کړې ده.
طالبانو دا تور رد کړی او ویلي یې دي چې د تحریک طالبان پاکستان موضوع د پاکستان کورنۍ مسئله ده. طالبانو همداراز ویلي چې هېڅ فرد یا ډلې ته اجازه نه ورکوي چې د افغانستان له خاورې د بل هېواد پر ضد فعالیت وکړي.
د پاکستان په حکومت کې یوې لوړپوړې سرچینې، چې نه یې غوښتل نوم یې خپور شي، نیمروز ته ویلي: «افغان طالبانو دا راپورونه پاکستان ته سپارلي، خو موږ باید ووینو چې ایا دا رښتیا هم جدي اقدام دی که نه.»
دغه پاکستانۍ سرچینې زیاته کړې: «په تېر کې د ورته ټولو ادعا شویو اقداماتو پایله یوازې ظاهري او لنډمهاله وه.»
دا څرګندونې ښيي چې اسلاماباد یوازې د نیول کېدو شمېر نه څاري، بلکې غواړي معلومه کړي چې دغه اقدامات په عملي توګه د تحریک طالبان پاکستان وړتیا کموي او که یوازې د پاکستان د فشار د کمولو لپاره لنډمهاله ګام دی.
له بلې خوا، د تحریک طالبان پاکستان د رسنیو یوې مسؤل د افغانستان کې د دې ډلې د غړو د نیول کېدو په اړه ویلي: «د افغان طالبانو پر وړاندې د ټي ټي پي دریځ ساده دی. د کندهار امیر د شاوخوا څلوېښت میلیونه افغانانو استازیتوب کوي، په داسې حال کې چې ټي ټي پي په داسې هېواد کې چې شاوخوا ۲۷۰ میلیونه وګړي لري، د خپلې نفوذ کړۍ او ملاتړ ادعا کوي.»
مفتي نور ولي چېرته دی؟
د تحریک طالبان پاکستان پر وړاندې د طالبانو وروستي اقدامات په داسې وخت کې شوي چې د دې ډلې د مشر مفتي نور ولي یوه نوې ویډیو هم خپره شوې ده.
په یوه نوې ویډیو کې، چې ویل کېږي په کرمه ولسوالۍ کې ثبت شوې، نور ولي له یوې ډبرې ایستونکې ادارې له کارکوونکو سره د خبرو پر مهال لیدل کېږي.
په بله ویډیو کې، د سرچینو په وینا، نوموړی د یوې بېپیلوټه الوتکې له لارې د یوه برید عملیات رهبري کوي.
پاکستاني چارواکو په وار وار ادعا کړې چې د تحریک طالبان پاکستان مشر په افغانستان کې په یوه خوندي سیمه کې د طالبانو تر ملاتړ لاندې ژوند کوي.
خو د ۲۰۲۵ کال په اکتوبر کې په کابل کې د مفتي نور ولي پر موټر د ادعا شوي برید وروسته، دا دویم ځل دی چې نوموړی په خیبر پښتونخوا کې په قبایلي سیمو کې په یوه ویډیو کې څرګندېږي.
نور ولي تر دې مخکې هم د ۲۰۲۵ کال د اکتوبر په ۱۶مه په یوه اتهدقیقهییزه ویډیو کې پر خپل ځان د برید راپور رد کړی و او ویلي یې وو چې په خیبر ولسوالۍ کې ژوند کوي.
د هغه د نوو ویډیوګانو خپرېدل په داسې وخت کې دي چې په افغانستان کې د نوموړي له ډلې سره د تړلو مرکزونو او کسانو پر وړاندې د طالبانو فشار زیات شوی دی.
سرچینو نیمروز ته هم ویلي چې له څو ورځو راهیسې له حافظ ګل بهادر سره، چې د پاکستاني طالبانو د یوې بلې ډلې مشر دی، اړیکه نه شي نیول کېدای. د هغه د اوسني وضعیت په اړه نور جزئیات نه دي خپاره شوي.
طالبانو تر اوسه په رسمي توګه د تحریک طالبان پاکستان د قوماندانانو او وسلهوالو د نیول کېدو په اړه څه نه دي ویلي. پاکستاني امنیتي چارواکو هم دا راپورونه تر اوسه په رسمي توګه نه دي تایید کړي.
د نیمروز ځانګړې زاویه
که د نیول کېدو راپورونه تایید شي، دا به د طالبانو له لوري د تحریک طالبان پاکستان پر وړاندې د چلند په څرنګوالي کې د پام وړ بدلون وښيي.
طالبانو تر دې وړاندې هڅه کړې چې له دې ډلې څخه سیاسي واټن وساتي او د هغې فعالیتونه د پاکستان کورنۍ مسئله وبولي.
خو یوازې د شاوخوا ۲۰ کسانو نیول د دې بدلون د اندازې لپاره کافي معیار نه دی. اصلي پوښتنه دا ده چې ایا طالبان به د تحریک طالبان پاکستان پر فعالیتونو دوامدار محدودیتونه ولګوي، که دا فشارونه یوازې د اسلاماباد د زیاتېدونکي فشار په ځواب کې لنډمهاله اقدام وي.
وروستۍ شننه
د دې بدلون اهمیت یوازې د شاوخوا ۲۰ کسانو تر نیول کېدو محدود نه دی.
که طالبان د تحریک طالبان پاکستان د قوماندانانو او وسلهوالو فعالیتونه په افغانستان کې په دوامدار ډول محدود کړي، د کابل او اسلاماباد ترمنځ د ترینګلتیا یوه له مهمو سرچینو څخه به د نوي پړاو پر لور ولاړه شي.
خو که دا اقدامات لنډمهاله وي او د دې ډلې فعالیتونه بیا په افغانستان کې پراخ شي، پاکستان به ښايي یو ځل بیا طالبان د تحریک طالبان پاکستان په پناه ورکولو او د فعالیت د زمینې په برابرولو تورن کړي.
په پای کې، د طالبانو اصلي ازموینه د نیول کېدو په اعلانونو کې نه، بلکې په دې کې ده چې ایا کولی شي د افغانستان له خاورې د پاکستان پر ضد د تحریک طالبان پاکستان د منظم فعالیت مخه په دوامدار ډول ونیسي که نه. همدا موضوع کولی شي د کابل او اسلاماباد د راتلونکو امنیتي اړیکو پر مسیر مستقیم اغېز ولري.
