د امریکا ولسمشر ډونالد ټرمپ، په جنوبي ایران کې د دغه هېواد د سهشنبې شپې له بریدونو وروسته ویلي چې د واشنګټن هدف تهران د خبرو مېز ته راوستل نه دي.
ټرمپ په خپل ټولنیز حساب «ټروت سوشال» کې لیکلي چې د ځینو راپورونو پر خلاف، هڅه نه کوي ایران د نوي تړون د لاسلیک لپاره تر فشار لاندې راولي.
هغه ویلي: «زما لپاره دا مهمه نه ده چې هغوی داسې یو تړون لاسلیک کړي چې د دوی له نظره بېارزښته وي. زه اوسنی وضعیت ډېر غوره ګڼم؛ داسې وضعیت چې نږدې بشپړ کنټرول د هرمز تنګي زموږ په لاس کې دی او د ایران اقتصاد په بشپړه توګه د ړنګېدو په حال کې دی.»
د امریکا ولسمشر همداراز ادعا کړې چې ایران یوازې هغه بهیر ځنډوي چې د ده په وینا «حتمي» دی.
ټرمپ له دې وروسته د ایران له خلکو پوښتنه کړې چې دوی به کله د اوسني وضعیت د بدلون لپاره اقدام وکړي.
دا څرګندونې وروسته له هغه کېږي چې امریکا اعلان وکړ په خپلو بریدونو کې یې د ایران په جنوب کې ځینې هدفونه ویشتلي دي؛ هغه اقدام چې د ایراني چارواکو له غبرګون سره مخ شوی او تهران یې د خپل حاکمیت سرغړونه بللې ده.
