د امریکا د جګړې وزارت غواړي د نضال حسن د اعدام بهیر په ژوندۍ بڼه خپور کړي. حسن د امریکا د پوځ پخوانی ارواپوه دی چې په ۲۰۰۹ کال کې یې د ټکساس ایالت په فورټ هود پوځي اډه کې په ډزو کې ۱۳ کسان وژلي وو. که دا پلان عملي شي، د امریکا د پوځي اعدامونو په تاریخ کې به بېساری اقدام وي.
رویټرز خبري اژانس د اکتوبر پر اتمه د پنټاګون د یوه چارواکي له قوله راپور ورکړی چې د حسن د اعدام نېټه د ۲۰۲۶ کال د ډسمبر درېیمه ټاکل شوې ده. دغه چارواکي، چې نوم یې نه دی افشا شوی، ویلي چې د ژوندۍ خپرونې په اړه به نور جزئیات وروسته اعلان شي. د راپور له مخې، اعدام به د ډزو د ډلې له لارې ترسره شي.
د امریکا د جګړې وزیر پیټ هګسېت تر دې مخکې ویلي وو چې د اعدام بهیر باید د خلکو په وړاندې ترسره شي، څو د هغه په وینا، خلک د دا ډول جرمونو له پایلو خبر شي. هغه د فورټ هود پوځي اډه، د پنجشنبې ورځ او د ماسپښین یوه بجه د اعدام لپاره مناسب انتخاب بللی و، ځکه چې ټاکل شوی وخت او ځای د ۲۰۰۹ کال د ډزو له پېښې سره سمون لري.
نضال حسن د ۲۰۰۹ کال په نومبر کې د ټکساس ایالت په فورټ هود پوځي اډه کې پر یوه طبي مرکز ډزې وکړې. په دې برید کې ۱۳ کسان ووژل شول او ۳۲ نور ټپیان شول. پوځي محکمې د ۲۰۱۳ کال په اګست کې نوموړی د قصدي قتل او د قصدي قتل د هڅې په ۴۵ تورونو مجرم وپېژاند او د اعدام حکم یې پرې صادر کړ.
حسن اوس ۵۶ کلن دی. هغه د امریکا د پوځ پخوانی ارواپوه دی او د نیول کېدو پر مهال تر ټپي کېدو وروسته یې د بدن یوه برخه فلج شوې ده. نوموړی له هغه وخت راهیسې له څرخلرونکې څوکۍ څخه کار اخلي.
د امریکا د پوځي قوانینو له مخې، د اعدام حکم باید د ولسمشر له خوا تایید شي. پنټاګون ویلي چې ولسمشر ډونالډ ټرمپ د هګسېت په سپارښتنه د حسن د اعدام له هغه طریقې سره موافقه کړې چې د ډزو ډله پکې کارول کېږي.
که حکم عملي شي، دا به د امریکا په پوځ کې له ۱۹۴۵ کال راهیسې د ډزو د ډلې له لارې لومړی اعدام او له ۱۹۶۱ کال راهیسې لومړی پوځي اعدام وي.
سره له دې چې د اعدام د ژوندۍ خپرونې خبره شوې، د دې پرېکړې ټول اجرایي جزئیات لا نه دي خپاره شوي. سپینې ماڼۍ هم په څرګنده نه ده ویلي چې ټرمپ په شخصي توګه د اعدام د ژوندۍ خپرونې ملاتړ کوي که نه.
دا پلان د مرګ د سزا د عامه نندارې په توګه د وړاندې کولو په اړه پوښتنې راپورته کوي. امریکايي چارواکي د جرم پر پایلو او د سزا پر علني ترسره کېدو ټینګار کوي، خو د خپرونې طریقه او د خلکو د لاسرسي حدود کولای شي د مرګ د سزا، انساني کرامت او د حکومت له خوا د مجازاتو د نندارې په اړه پراخ بحثونه رامنځته کړي.
