د ایران د وسله والو ځواکونو لوی درستیز علي عبداللهي د امریکا د ولسمشر ډونالډ ټرمپ د ګواښونو په غبرګون کې ویلي، تهران به اجازه ورنه کړي چې امریکایي جنګي بېړۍ یو ځل بیا فارس خلیج ته داخلې شي. دا څرګندونې په داسې حال کې شوې چې دواړه هېوادونه په سیمه کې د پوځي حضور او د سیاسي خبرو اترو د راتلونکي په اړه توندې څرګندونې کوي.
ایراني رسنیو د شنبې په ورځ، د لړم په دویمه، د عبداللهي څرګندونې خپرې کړې دي. هغه د ایسنا خبري اژانس په حواله ویلي: «د امریکا ولسمشر باید په خوب کې وویني چې پوځیان او پوځ یې یو ځل بیا فارس خلیج ته داخلېږي. هغوی به دا هیله د تل لپاره له ځان سره ګور ته یوسي.»
عبداللهي زیاته کړې چې ایران به په هېڅ حالت کې امریکایي پوځي بېړیو ته فارس خلیج ته د ننوتلو اجازه ورنه کړي. هغه دا ادعا هم کړې چې د امریکا سمندري ځواک نور نه شي کولای د فارس خلیج شاوخوا سمندري سیمو او د ایران ځمکنیو اوبو ته نږدې شي.
د ایران د سپاه پاسداران ویاند حسین محبي هم تېره اوونۍ ادعا کړې وه چې امریکایي پوځي بېړۍ د هرمز تنګي څخه شاوخوا ۶۰۰ تر ۷۰۰ کیلومترو پورې شاته تللې دي. خو د دې ادعا خپلواک تایید نه دی وړاندې شوی.
په مقابل کې، د امریکا ولسمشر ډونالډ ټرمپ ویلي چې د ایران هوايي ځواک، سمندري ځواک او توغندیز توان یې له منځه وړی او هرمز تنګی د امریکا د پوځ تر کنټرول لاندې دی. هغه د جمعې په ورځ خبرداری ورکړی چې که ایران له سیاسي هوکړې سره موافقه ونه کړي، ښايي نوي پوځي عملیات پیل شي.
د دواړو هېوادونو د چارواکو څرګندونې ښيي چې پوځي ګواښونه لا هم د تهران او واشنګټن د عامه دریځونو یوه برخه ده. خو د پوځي وړتیاوو او د سیمې پر اوبو د کنټرول په اړه د دواړو لورو ادعاوې، د خپلواکو شواهدو له نشتوالي سره، باید د قطعي واقعیتونو په توګه ونه ګڼل شي.
