د طالبانو د امر بالمعروف، نهی عن المنکر او شکایتونو اورېدو وزیر محمد خالد حنفي له خپلو مسئولانو او کارکوونکو غوښتي چې له قومي او ژبني تعصب او شخصي چلندونو ډډه وکړي او له خلکو سره ښه او مسلکي چلند ولري.
د دغه وزارت د خبرپاڼې له مخې، حنفي دا څرګندونې له مسئولانو او کارکوونکو سره په یوه اصلاحي غونډه کې کړې دي.
نوموړي د اداري نظم پر مراعتولو، د دندو پر مسئولانه ترسره کولو او له خلکو سره د اخلاقي او اسلامي اصولو له مخې پر چلند ټینګار کړی دی. هغه ویلي چې کارکوونکي باید د نظام په چوکاټ کې له تعصب او شخصي چلندونو ډډه وکړي.
حنفي همداراز د خلکو د ستونزو پر وخت حل ته د پاملرنې غوښتنه کړې او ټینګار یې کړی چې د وزارت کارکوونکي باید د خلکو ستونزو ته پر وخت رسېدنه وکړي.
دا څرګندونې په داسې حال کې کېږي چې په افغانستان کې له خلکو سره د دغه وزارت د کارکوونکو چلند او د هغوی له خوا د امرونو د پلي کېدو څرنګوالی د بحث وړ موضوعات دي.
خو د وزارت په خبرپاڼه کې د دې غونډې د جوړېدو د لاملونو، د سپارښتنو د عملي کېدو د څارنې او د سرغړونو پر وړاندې د احتمالي اقداماتو په اړه نور جزئیات نه دي ورکړل شوي.
