هند او روسیې د چهارشنبې په ورځ، د اکتوبر پر ۱۴مه، په نوي ډیلي کې د افغانستان او پاکستان په اړه د ځانګړو خبرو اووم پړاو ترسره کړ. په دې غونډه کې دواړو لورو د ګډو ګټو پر موضوعاتو او د هغو پر نړیوالو امنیتي اغېزو بحث وکړ.
د هند د بهرنیو چارو وزارت اعلان کړی چې د دې غونډې مشري په ګډه د هند د ملي امنیت د مرستیال سلاکار پاوان کاپور او د روسیې د امنیت شورا د منشي د مرستیال الکساندر وندیکتوف پر غاړه وه.
د دغه وزارت د خبرپاڼې له مخې، دواړو لورو د هند او روسیې د ځانګړې ستراتیژیکې ملګرتیا په چوکاټ کې د دوهاړخیزې همکارۍ پر پیاوړتیا ټینګار کړی دی.
الکساندر وندیکتوف د خپل سفر پر مهال د هند د ملي امنیت له سلاکار اجیت دووال سره هم لیدلي دي.
خو د هند د بهرنیو چارو وزارت د افغانستان او پاکستان په اړه د مطرح شویو موضوعاتو مشخص جزئیات نه دي خپاره کړي. له همدې امله، روښانه نه ده چې دواړو لورو د کومو امنیتي اندېښنو، سیاسي بدلونونو یا مشخصو همکاریو په اړه خبرې کړې دي.
د دې غونډې ترسره کېدل ښيي چې افغانستان او پاکستان لا هم د هند او روسیې د امنیتي سلا مشورو له مهمو موضوعاتو څخه دي. خو د نورو معلوماتو له خپرېدو پرته، د دغو خبرو د مشخصو پایلو یا د دواړو هېوادونو د احتمالي پرېکړو په اړه قضاوت نه شي کېدای.
سرچینه: نیمروز
