د پاکستان د نشهيي توکو پر وړاندې د مبارزې ځواک وايي، په کراچۍ کې له یوې قضیې څخه د ترلاسه شویو استخباراتي معلوماتو او له سریلانکا او د امریکا د نشهيي توکو پر وړاندې د مبارزې ادارې سره د دغو معلوماتو د شریکولو له لارې، له افغانستان سره تړلې یوه نړیواله نشهيي توکو د قاچاق شبکه پېژندل شوې او له منځه وړل شوې ده. د دې عملیاتو په ترڅ کې ټولټال ۶۷۱ کیلوګرامه میتامفتامین کشف شوی دی.
دغه ځواک د جمعې په ورځ، د سنبلې په ۱۳مه، وویل چې د کراچۍ له بندر څخه د یوه کانټینر په دننه کې ۲۰۰ کیلوګرامه میتامفتامین کشف او احسانالله، چې افغان وګړی بلل شوی، د دې شبکې د مشر په توګه نیول شوی دی. د شبکې یو شمېر ځايي همکاران هم نیول شوي دي.
د پاکستان د نشهيي توکو پر وړاندې د مبارزې ځواک په وینا، له احسانالله څخه د پوښتنو او پلټنو پر مهال داسې معلومات ترلاسه شول چې پاکستاني چارواکو له سریلانکايي چارواکو او د امریکا د نشهيي توکو پر وړاندې د مبارزې له ادارې سره شریک کړل.
د دغو معلوماتو پر بنسټ، د امریکا د نشهيي توکو پر وړاندې د مبارزې ادارې او سریلانکايي چارواکو په ګډه د کولمبو په بندر کې عملیات ترسره کړل او ۴۷۱ کیلوګرامه میتامفتامین یې چې د بارونو په منځ کې پټ شوي وو، کشف کړل.
د کشف شویو نشهيي توکو ټول ارزښت شاوخوا ۲۱ میلیونه ډالر ښودل شوی دی.
د پاکستان د نشهيي توکو پر وړاندې د مبارزې ځواک وايي، دغې شبکې غوښتل د پاکستان له خاورې د نورو هېوادونو پر لور د نشهيي توکو د لېږد لپاره د ترانزیټي لارې په توګه کار واخلي. دغه اداره پاکستان هم د افغانستان د سرچینې لرونکو نشهيي توکو د ترانزیټ لاره او هم د دغو موادو قرباني بللې ده.
دا ادعا داسې مهال مطرح شوې چې دوه ورځې وړاندې د سریلانکا پولیسو او په کولمبو کې د امریکا سفارت هم په یوه ګډ عملیات کې د نږدې نیم ټن میتامفتامین د کشف خبر ورکړی و. خو د سریلانکا په لومړني راپور کې نیول شوې شبکه پاکستانۍ بلل شوې وه او دوه پاکستاني وګړي هم په تړاو یې نیول شوي وو.
د دواړو لورو ترمنځ د روایت توپیر د دې قضیې مهم اړخ دی. پاکستاني چارواکي دغه شبکه له افغانستان سره تړلې بولي، په داسې حال کې چې د سریلانکا په لومړني راپور کې د نیول شویو کسانو پر پاکستاني تابعیت ټینګار شوی دی. دا موضوع ښيي چې په سیمه کې د نشهيي توکو د قاچاق لارې ښايي یوازې له یوه هېواد سره محدودې نه وي او قاچاقي شبکې د نړیوالو بازارونو پر لور د موادو د لېږد لپاره له څو هېوادونو څخه استفاده وکړي.
له بلې خوا، د پاکستان، سریلانکا او امریکا ترمنځ استخباراتي همکاري ښيي چې د دغو شبکو پر وړاندې مبارزه تر بل هر وخت ډېره د هېوادونو ترمنځ د معلوماتو پر تبادلې ولاړه شوې ده. که په راتلونکو څېړنو کې له افغانستان سره د کشف شویو موادو تړاو تایید شي، دا قضیه به یو ځل بیا پر طالبانو او د سیمې پر هېوادونو د نشهيي توکو د تولید، انتقال او قاچاق د لارو د کنټرول لپاره فشارونه زیات کړي.
خو د نشهيي توکو د سرچینې او د نیول شویو کسانو د رول په اړه مطرح شوې ادعاوې لا هم قضايي څېړنو او خپلواکو شواهدو ته اړتیا لري. یوازې په یوه ترانزیټي مسیر کې د یوې محمولې کشف، په خپله د قاچاق د ټولې شبکې په تنظیم کې د یوه هېواد د رول د اثبات لپاره کافي نه دی.
