والسټریټ ژورنال راپور ورکړی چې د ایران له خوا د هرمز تنګي د بیا پرانیستلو لپاره د نویو شرطونو مطرح کېدو، د سپینې ماڼۍ هغه هڅې پېچلې کړې دي چې غواړي د جګړې د پای او احتمالي هوکړې لپاره زمینه برابره کړي.
د دې ورځپاڼې په وینا، د امریکا ولسمشر ډونالډ ټرمپ په وروستیو اوونیو کې له خپلو لوړپوړو سلاکارانو سره په شخصي خبرو کې دا احتمال مطرح کړی چې امریکا ښايي حتی له هستهیي هوکړې پرته له جګړې ووځي؛ په دې شرط چې ایران هرمز تنګی په بشپړ ډول پرانیزي.
د راپور له مخې، د هستهیي خبرو له سختېدو سره سپینې ماڼۍ د هرمز د بیا پرانیستلو موضوع ته لا ډېره پاملرنه کړې او ټرمپ هڅه کړې چې د یوه سیاسي بریا د اعلان لپاره زمینه برابره کړي.
خو د تهران د نویو شرطونو له مطرح کېدو وروسته دغه هڅې له لا ډېرو خنډونو سره مخ شوې دي.
د ایران د ملي امنیت د عالي شورا منشي محمدباقر ذوالقدر د زمري پر ۱۷مه ویلي چې هرمز تنګی به تر هغه پورې پرانیستل نه شي، څو امریکا خپل چلند «اصلاح» نه کړي.
د هغه په وینا، د تهران په شرطونو کې د امریکا د ګواښونو پای، پر ایران او د هغه پر متحدانو د جګړې پای، د سمندري محاصرې ختمول، د ایران له شاوخوا څخه د امریکایي ځواکونو وتل، د دواړو جګړو د زیانونو جبران، د بندیزونو لغوه کول او د ایران د کنګل شویو شتمنیو خوشې کول شامل دي.
والسټریټ ژورنال لیکلي چې دغه شرطونه د ټرمپ لپاره د جګړې د پای او وتلو احتمالي لارې لا محدودوي او ښيي چې تهران ښايي ځان د اوږدې او فرسایشي شخړې لپاره چمتو کوي.
هرمز تنګی د نړۍ د انرژۍ د لېږد له مهمو سمندري مسیرونو څخه دی او د بېړیو په تګ راتګ کې هر ډول اختلال کولای شي د نفتو پر بازار او نړیوال اقتصاد اغېز وکړي. له همدې امله، د دې تنګي بیا پرانیستل د کړکېچ د کمولو لپاره د روانو دیپلوماتیکو هڅو له مهمو موضوعاتو څخه ګرځېدلي دي.
سره له دې، د هرمز د بیا پرانیستلو پر شرطونو اختلاف لا هم پر ځای دی او څرګنده نه ده چې تهران او واشنګټن به وکولای شي د داسې یوه میکانیزم پر سر هوکړه وکړي چې د دواړو لورو لپاره د منلو وړ وي.
