راپورونه ښيي چې فرانسه، جرمني او د اروپایي ټولنې یو شمېر نور غړي هېوادونه د دې ټولنې د ډیپلوماټیک خدمت د جوړښت د اصلاح لپاره پر نوو طرحو غور کوي.
د فایننشل ټایمز ورځپاڼې د اروپایي لوړپوړو چارواکو له قوله راپور ورکړی چې د دغو احتمالي بدلونونو هدف د نړیوالو او جیوپولیټیکو بحرانونو پر وړاندې د اروپایي ټولنې د چټک او اغېزمن غبرګون وړتیا لوړول دي.
د راپور له مخې، که دغه اصلاحات عملي شي، د اروپایي ټولنې د بهرني سیاست د مشرې کایا کالاس او د اروپایي بهرني اقدام د خدمت (EEAS) ځینې واکونه به محدود او یا هم بېرته اروپایي کمېسیون او د غړو هېوادونو حکومتونو ته وسپارل شي.
ځینې اروپایي پلازمېنې په دې باور دي چې د اروپایي ټولنې اوسنی ډیپلوماټیک جوړښت په ځینو نړیوالو بحرانونو کې مطلوبه پایله نه ده ورکړې او د پرېکړو په بهیر کې له ستونزو سره مخ دی.
د اروپایي بهرني اقدام خدمت په ۲۰۱۱ کال کې د دې لپاره رامنځته شو چې د غړو هېوادونو د بهرني سیاست ترمنځ همغږي زیاته کړي او د نړۍ په کچه د اروپایي ټولنې واحد دریځ پیاوړی کړي.
خو له تېرو څو کلونو راهیسې د اوکراین جګړې، د منځني ختیځ بحرانونو او د نړیوالو سیالیو زیاتېدو د دې ادارې د اغېزمنتیا په اړه بحثونه راپارولي دي.
سره له دې، تر اوسه کومه وروستۍ پرېکړه نه ده شوې او د غړو هېوادونو ترمنځ مشورې او بحثونه دوام لري.
اروپایي ټولنې هم تر اوسه د دغو احتمالي اصلاحاتو د جزئیاتو په اړه رسمي څرګندونې نه دي کړي.
د دې تحول اهمیت په دې کې دی چې که د اروپایي ټولنې د ډیپلوماټیک جوړښت واکونه بیا ووېشل شي، نو دا به د بروکسل د بهرني سیاست پر رول، د غړو هېوادونو پر نفوذ او د نړیوالو بحرانونو پر وړاندې د اروپا پر راتلونکي دریځ مستقیم اغېز ولري.
