د امریکا ولسمشر ډونالډ ټرمپ ویلي چې ښايي په نږدې راتلونکې کې په ایران کې د ځینو مهمو زیربناوو پر ضد د نویو بریدونو امر صادر کړي.
ټرمپ له فاکس نیوز سره په خبرو کې ادعا کړې چې د ایران له لوري د مذاکراتو اوږدېدل د دې لامل شوي چې واشنګټن د نورو انتخابونو په اړه فکر وکړي.
هغه وویل چې د نویو بریدونو د امر صادرول «نږدې» دي او خبرداری یې ورکړ چې که د خبرو اترو بهیر بدلون ونه مومي، نو نوې پرېکړې به ونیول شي.
د امریکا ولسمشر همداراز ادعا وکړه چې د وروستیو امریکایي عملیاتو پر مهال هغه راداري سیستمونه په نښه شوي چې د ده په وینا ایران د اوربند په موده کې بېرته رغولي وو.
ټرمپ ادعا وکړه چې د دغو راداري سیستمونو یوه لویه برخه له منځه وړل شوې ده.
هغه د خپلو څرګندونو په یوه بله برخه کې د ایران پوځي وضعیت هم تر پوښتنې لاندې راوست او ادعا یې وکړه چې د ایران د هوايي او سمندري ځواکونو د وړتیاوو یوه مهمه برخه زیانمنه شوې ده.
ټرمپ په خپل ټولنیز پلیټفارم «ټروت سوشال» کې هم لیکلي چې ایران د یوه احتمالي توافق لپاره ډېر وخت ضایع کړی او اوس باید د خپلو پرېکړو پایلې ومني.
هغه یو ځل بیا ایران د «منځني ختیځ قلدر» وباله او ادعا یې وکړه چې تهران اوس د پخوا په پرتله په کمزوري موقف کې قرار لري.
دغه څرګندونې داسې مهال کېږي چې د واشنګټن او تهران ترمنځ سیاسي او امنیتي کړکېچ لا هم دوام لري او د دواړو لورو ترمنځ د احتمالي توافق راتلونکی لا روښانه نه دی.
تر اوسه ایراني چارواکو د ټرمپ دغو تازه څرګندونو ته رسمي غبرګون نه دی ښودلی.
د دې موضوع مهم اړخ دا دی چې د امریکا د ولسمشر وروستي خبرداري د مذاکراتو پر راتلونکي، د سیمې پر امنیتي وضعیت او د واشنګټن او تهران پر اړیکو مستقیم اغېز لرلی شي.
