د متحده ایالاتو د بهرنیو چارو وزیر مارکو روبیو ویلي چې په اوسنیو شرایطو کې هېڅ افغان کډوال ته د امریکا خاورې ته د ننوتلو اجازه نه ورکول کېږي او واشنګټن د دغو کسانو د مېشتېدو لپاره له نورو هېوادونو سره پر بدیلو لارو چارو کار کوي.
روبیو دغه څرګندونې د امریکا د سنا د بهرنیو اړیکو کمېټې په غونډه کې وکړې. هغه د یوه سناتور د پوښتنې په ځواب کې وویل چې په قطر کې مېشت افغان کډوال به خوندي هېوادونو ته ولېږدول شي، خو دا مهال د هغوی امریکا ته د انتقال امکان نه شته.
په غونډه کې د امریکا یوه سناتور خبرداری ورکړ چې شاوخوا زر او سل افغانان، چې د امریکا پخواني همکاران، ماشومان او د امریکایي پوځیانو د کورنیو غړي پکې شامل دي، لا هم په قطر کې د نامعلوم برخلیک سره مخ دي.
هغه اندېښنه څرګنده کړه چې دغه کسان ښايي افغانستان ته بېرته واستول شي یا هغو هېوادونو ته ولېږدول شي چې له بشري او روغتیايي ستونزو سره مخ دي.
سناتور له امریکایي ادارې وغوښتل چې د دغو کسانو د لېږد او د هغوی د دوسیو د حل لپاره له کانګرس سره همکاري وکړي او د اوږدې مودې بې برخلیکه وضعیت ته د پای ټکی کېږدي.
خو مارکو روبیو وویل چې په اوس وخت کې د افغان کډوالو د منلو ژمنه نه شي ورکولای. هغه زیاته کړه چې د تېر کال له ځینو امنیتي پېښو وروسته یو اجرایي فرمان نافذ شوی او د همدې له امله د افغانانو د داخلېدو پروسه درېدلې ده.
د امریکا د بهرنیو چارو وزیر وویل چې حکومت یې له څو هېوادونو سره خبرې کړې دي او لږ تر لږه پنځو هېوادونو د دغو افغان کډوالو د یوې برخې د منلو لپاره چمتووالی ښودلی دی.
هغه ټینګار وکړ چې واشنګټن غواړي د دغو کسانو لپاره مناسب او خوندي ځایونه پیدا کړي او په دې برخه کې به له قانون جوړوونکو سره همکاري وکړي.
د افغان کډوالو موضوع له ۲۰۲۱ کال وروسته د امریکا د کډوالۍ د تګلارې له مهمو ننګونو څخه پاتې شوې ده. زرګونه افغانان چې له امریکایي ځواکونو او ادارو سره یې کار کړی و، د کابل له سقوط وروسته قطر، متحده عربي اماراتو، البانیا او نورو هېوادونو ته ولېږدول شول او لا هم د خپلو دوسیو د وروستۍ پرېکړې په تمه دي.
د روبیو وروستۍ څرګندونې ښيي چې واشنګټن په نږدې راتلونکي کې د افغان کډوالو د منلو لپاره د دروازو د بیا پرانیستلو نیت نه لري او هڅه کوي د درېیمو هېوادونو له لارې د دغو کسانو د مېشتېدو ستونزه حل کړي.
دغه دریځ د هغو زرګونو افغانانو اندېښنې نورې هم زیاتوي چې د امریکا له ادارو سره د همکارۍ له امله خپل راتلونکی له خطر سره مخ بولي او افغانستان ته بېرته ستنېدل د خپل ژوند لپاره جدي ګواښ ګڼي.
