د امریکا ولسمشر ډونالډ ټرمپ ویلي چې د اسرائیل له صدراعظم بنیامین نتانیاهو سره تر خبرو وروسته پرېکړه شوې چې بیروت ته به هېڅ ځواک ونه لېږل شي او هغه ځواکونه چې د استولو په حال کې وو، بېرته ګرځول شوي دي.
ټرمپ په ټروت سوشیل ټولنیزه شبکه کې لیکلي چې له نتانیاهو سره یې خبرې «ډېرې رغنده» وې او دواړو لورو د وضعیت د لا خرابېدو د مخنیوي په اړه بحث کړی دی.
د امریکا ولسمشر همدارنګه ادعا کړې چې د خپلو لوړپوړو استازو له لارې یې له حزبالله سره اړیکې نیولې او دغه ډلې د ډزو د بشپړ درولو سره موافقه کړې ده.
د هغه په وینا، اسرائیل به هم نوی برید ونه کړي او دواړه لوري به د شخړې له پراخېدو ډډه وکړي.
ټرمپ په جلا پیغام کې ویلي چې د امریکا او ایران ترمنځ روانې خبرې «په چټکۍ» سره مخ پر وړاندې روانې دي.
دا څرګندونې داسې مهال کېږي چې د ایران تسنیم خبري اژانس راپور ورکړی، د ایران مذاکره کوونکي پلاوي د لبنان د اوربند د احتمالي نقض په غبرګون کې د منځګړو له لارې د خبرو اترو او د متنونو د تبادلې بهیر درولی دی.
د راپور له مخې، ایراني چارواکي باور لري چې د لبنان وضعیت د اوربند له اړوندو شرطونو سره تړاو لري او وروستي پرمختګونه کولای شي د مذاکراتو پر بهیر اغېز وکړي.
تر اوسه د ایران، اسرائیل او حزبالله رسمي چارواکو د ډونالډ ټرمپ د دغو ادعاوو په اړه مستقیم غبرګون نه دی ښودلی.
کارپوهان وایي چې د لبنان وضعیت، د هرمز تنګي امنیت او د ایران د اټومي پروګرام موضوعات اوس هم د سیمې د سیاسي او امنیتي معادلو مهم عناصر ګڼل کېږي او هر بدلون کولای شي د روانو ډیپلوماتیکو هڅو پر برخلیک اغېز ولري.
