په اسرائیل کې د امریکا سفیر مایک هاکبي وایي، د ایران حکومت باید له دوو سختو ضربو وروسته د امریکا د ولسمشر ډونالډ ټرمپ د احتمالي پوځي اقدام د جديت په اړه پوه شوی وي.
هاکبي له العربیه انګلیسي سره په خبرو کې ویلي، تمه ده چې د اسلامي جمهوریت چارواکي په تدریجي ډول درک کړي چې ټرمپ هغه مهال د پوځي اقدام په عملي کولو کې جدي دی چې تشخیص کړي پوځي اقدام یوازینۍ موجوده لار ده.
په اسرائیل کې د امریکا سفیر د ټرمپ پخوانیو څرګندونو ته په اشاره ویلي چې د امریکا ولسمشر ایران ته خبرداری ورکړی چې که د اټومي وسلو د ترلاسه کولو او د یورانیمو د غني کولو له هڅو لاس وانخلي او د هرمز تنګی خلاص پرې نه ږدي، پراخ پوځي اقدام کولای شي د انتخابونو له ډلې یو وي.
هاکبي په ځواب کې چې ایا ټرمپ به په رښتیا داسې اقدام وکړي، ویلي چې په دې اړه وروستۍ پرېکړه یوازې د امریکا د ولسمشر په واک کې ده.
هغه ویلي: «زه دې پوښتنې ته ځواب نه شم ورکولای، ځکه هغه یوازینی منتخب کس او یوازینی څوک دی چې د دې پرېکړې واک لري او بیا یې عملي کولای شي.»
د امریکا سفیر زیاته کړې چې د ټرمپ پر قضاوت باور لري او ویلي یې دي چې د امریکا ولسمشر تر اوسه په دې موضوع کې سمې پرېکړې کړې دي.
د هاکبي څرګندونې په داسې حال کې مطرح کېږي چې د تهران او واشنګټن ترمنځ د ایران د اټومي پروګرام او د هرمز تنګي د وضعیت پر سر اختلافونه لا هم دوام لري.
امریکايي چارواکو تر دې مخکې هم ویلي چې که دیپلوماتیکې هڅې ناکامې شي، د پوځي انتخاب احتمال شته.
په مقابل کې، اسلامي جمهوریت د خپل اټومي پروګرام او هرمز تنګي په اړه پر خپلو دریځونو ټینګار کوي او د امریکا له خوا د شرطونو د منلو لپاره هر ډول فشار ردوي.
د امریکا د سفیر وروستۍ څرګندونې ښيي چې واشنګټن لا هم پوځي اقدام د تهران پر وړاندې د فشار د یوې وسیلې په توګه ساتي؛ خو د هر ډول پوځي اقدام وروستۍ پرېکړه د امریکا ولسمشر او د وضعیت د هغه پر ارزونه پورې تړلې ده.
