تازه خپاره شوي معلومات ښيي چې د امریکا د ولسمشر ډونالډ ټرمپ د تېرې میاشتې ترکیې سفر پر مهال، امریکايي امنیتي ځواکونو د ایران له لوري د احتمالي برید د مخنیوي لپاره په انقره هوايي ډګر کې یو پټ فریب عملیات ترسره کړي دي.
نیویارک پوسټ راپور ورکړی چې ټرمپ د جولای پر اتمه په ترکیه کې د ناټو له غونډې وروسته، په لومړي سر کې د رسنیو د کمرې مخې ته د امریکا د ولسمشرۍ ځانګړې الوتکې، ایر فورس وان، ته پورته شو.
خو څو دقیقې وروسته، د یوې محرمانه طرحې له مخې، ټرمپ د الوتکې له شا دروازې راووت او د خوړو د لېږد او خدمت یوه لارۍ ته انتقال شو.
د راپور له مخې، دغه لارۍ بیا ټرمپ د هوايي ډګر پر میدان کې یوې کوچنۍ پوځي الوتکې، سي-۳۲ اې، ته انتقال کړ.
په همدې وخت کې، خبریالان او د سپینې ماڼۍ یو شمېر کارکوونکي چې له دې طرحې خبر نه وو، ایر فورس وان ته پورته شول او له هغوی وغوښتل شول چې د الوتکې پردې ښکته کړي.
نیویارک پوسټ لیکلي چې یوازې یو شمېر لوړپوړي پوځي او امنیتي چارواکي د دې عملیاتو له طرحې خبر وو؛ په دوی کې د امریکا د دفاع وزیر پیت هګست او جنرال ډان کین، د ګډو ځواکونو د لوی درستیزانو کمېټې رئیس، هم شامل وو.
د راپور له مخې، ټرمپ وروسته د خبریالانو د پوښتنې په ځواب کې چې ولې د الوتکې پردې ښکته شوې وې، په شوخ انداز کې د ایران ګواښونو ته اشاره وکړه.
هغه ویلي چې تل د ایران د ګواښونو اصلي هدف دی او ښايي د دوی الوتنه له خطر سره مخ شوې وای.
د نیویارک پوسټ د راپور له مخې، سي-۳۲ اې الوتکې چې ټرمپ پکې سپور و، له انقرې وروسته په بریتانیا کې د شاهي هوايي ځواک په میلدنهال اډه کې ښکته شوه.
ټرمپ له لنډې تمې وروسته یو ځل بیا د ولسمشرۍ ځانګړې الوتکې ته پورته شو او واشنګټن ته ستون شو.
که دا معلومات تایید شي، د ټرمپ د ترکیې د سفر پر مهال د امریکا د امنیتي اندېښنو د لوړې کچې څرګندونه کوي.
خو تر اوسه د ایران له لوري د ټرمپ پر وړاندې د یوه مشخص برید د طرحې په اړه رسمي معلومات نه دي خپاره شوي. د دې عملیاتو په اړه خپاره شوي معلومات تر ډېره د رسنیزو راپورونو او د هغو سرچینو پر څرګندونو ولاړ دي چې په راپورونو کې ورته اشاره شوې ده.
