د تهران او واشنګټن ترمنځ د زیاتېدونکو ترینګلتیاوو په لړ کې، د ایران د بهرنیو چارو وزیر عباس عراقچي د پاکستان د پوځ له لوی درستیز عاصم منیر، د ترکیې د بهرنیو چارو له وزیر هاکان فیدان او د سعودي عربستان د بهرنیو چارو له وزیر فیصل بن فرحان آل سعود سره په جلا ټلیفوني خبرو کې د کړکېچ د پراخېدو د احتمالي پایلو په اړه سلا مشورې کړې دي.
د راپورونو له مخې، عراقچي په دغو خبرو کې د امریکا د هر ډول احتمالي پوځي اقدام په اړه خبرداری ورکړی او ټینګار یې کړی چې که د ایران پر ملي حاکمیت یا امنیت برید وشي، تهران به «قاطع ځواب» ورکړي.
دغه ډیپلوماټیکې اړیکې په داسې حال کې ترسره کېږي چې په سیمه کې د شخړې د پراخېدو په اړه اندېښنې زیاتې شوې او د کړکېچ د لا زیاتېدو د مخنیوي لپاره سیاسي او ډیپلوماټیکې هڅې دوام لري.
ایراني چارواکو تر اوسه د دغو ټلیفوني خبرو د محتوا نور جزئیات نه دي خپاره کړي، خو دا تماسونه د واشنګټن سره د زیاتېدونکي کړکېچ په شرایطو کې د سیمې له اغېزناکو هېوادونو سره د تهران د سلا مشورو یوه برخه بلل کېږي.
