د امریکا ولسمشر ډونالډ ټرمپ اعلان کړی چې د «سولې پلاوي» د غزې د بشپړې بېوسلې کولو او د حماس په ګډون د نورو وسلهوالو ډلو د وسلو د سپارلو لپاره یوې «تاریخي» هوکړې ته رسېدلی دی. د هغه په وینا، دغه هوکړه به د «ټرمپ د شل مادهییز پلان» له مخې په پړاویز ډول عملي شي.
ټرمپ ویلي، د هوکړې له مخې به د وسلو سپارلو بهیر په تدریجي ډول ترسره کېږي او له هغې سره هممهاله به اسرائیلي ځواکونه هم په پړاوونو کې له غزې ووځي.
د امریکا ولسمشر زیاته کړې چې د غزې ملکي اداره به یوه نوي فلسطیني حکومت ته وسپارل شي، چې د سولې له پلاوي سره به په همغږۍ کار کوي. د هغه په وینا، یو نړیوال د ثبات ځواک او نوی جوړېدونکی فلسطیني پولیس به د غزې د امنیت مسئولیت پر غاړه واخلي.
ټرمپ له مصر، قطر او ترکیې څخه د خبرو اترو په منځګړیتوب کې د هغوی د رول له امله مننه کړې او ټینګار یې کړی چې متحده ایالات به اجازه ور نه کړي د ۲۰۲۳ کال د اکتوبر د اوومې نېټې په څېر یو بل امنیتي ګواښ له غزې څخه رامنځته شي.
د امریکایي چارواکو د معلوماتو له مخې، په دې هوکړه کې د وسلو پړاویز سپارل، د تونلونو او د وسلو د تولید د مرکزونو ویجاړول، او د نړیوالو ځواکونو له خوا د هوکړې د عملي کېدو څارنه شامله ده. همدارنګه، د غزې ملکي اداره به یوه فلسطیني تخنیکي حکومت ته وسپارل شي.
خو تر اوسه د هوکړې د عملي کېدو دقیق مهالویش، د بېوسلې کولو د ارزونې میکانیزم او د ټولو اړخونو د ژمنو د پلي کېدو څرنګوالی په بشپړ ډول نه دی خپور شوی.
په ورته وخت کې، راپورونه ښيي چې اسرائیل د خپلو ځواکونو له وتلو وروسته د امنیتي تضمینونو په اړه لا هم احتیاط کوي، او حماس هم تر اوسه د دې هوکړې بشپړ رسمي تایید نه دی کړی.
شنونکي وایي، د دې طرحې بریالیتوب به د ښکېلو اړخونو عملي همکارۍ، د نړیوالې ټولنې اغېزمنې څارنې، د غزې د بیارغونې لپاره د مالي سرچینو برابرولو او د جګړې د بیا پیل مخنیوي پورې تړلی وي.
