د امریکا ولسمشر ډونالډ ټرمپ د اسرائیل له لومړي وزیر بنیامین نتانیاهو او د امریکا د استازو جرګې له یو شمېر غړو سره په سپینه ماڼۍ کې د خپلې لیدنې انځورونه خپاره کړي او دغه غونډه یې «لوی ویاړ» او «ډېره ښه» بللې ده.
ټرمپ په یوه پیغام کې لیکلي: «ښکاره ده چې د ډېرو مهمو موضوعاتو په اړه خبرې وشوې.»
بنیامین نتانیاهو هم د دې لیدنې پر مهال د ټرمپ د ادارې له ملاتړ څخه مننه وکړه او ویې ویل چې دغه خبرې د منځني ختیځ د راتلونکي امنیت لپاره ډېر اهمیت لري.
د اسرائیل لومړي وزیر د سپینې ماڼۍ سره د نږدې همغږۍ پر اړتیا هم ټینګار وکړ او ویې ویل چې ګډو موخو ته د رسېدو او تلپاتې سولې د رامنځته کولو لپاره باید د هغه په وینا، پر «ګډو دښمنانو اعظمي فشار» دوام ومومي.
دواړو لورو د امنیتي موضوعاتو ترڅنګ د ابراهیم تړونونو د پراختیا او له عربي هېوادونو سره د اسرائیل د ډیپلوماتیکو اړیکو د پراخېدو په اړه هم د نظر تبادله وکړه.
ټرمپ هیله څرګنده کړه چې د دغو سیاستونو دوام به په منځني ختیځ کې د ثبات د زیاتېدو او د سیمې د اوږدمهالو کړکېچونو د کمېدو لامل شي.
