د طالبانو د ارشاد، حج او اوقافو وزارت د روانې اوونۍ د جمعې لمانځه لپاره ټاکل شوې خطبه خپره کړې چې پکې د ښځو د عطر کارول، د ودونو په مراسمو کې د ښځو او نارینهوو ګډا او د کوژدې او واده ځینې دودونه د طالبانو له نظره «له شریعت سره خلاف» بلل شوي دي.
په لس مخیز متن کې، چې «په ودونو او نورو خوشالیو کې د منکراتو او غیرشرعي دودونو څخه ډډه» نومول شوی، له شرعي نکاح مخکې د هلک او نجلۍ ترمنځ د ګوتو د ګوتې (انګشترۍ) تبادله هم «ناجایزه» بلل شوې او ادعا شوې چې دا دود د مسیحیانو له رواجونو څخه اخیستل شوی دی.
د طالبانو د ارشاد وزارت ویلي، په ځینو کوژدو کې هلک او نجلۍ له شرعي نکاح مخکې یو بل ته ګوته ور اغوندي یا یو د بل پر لاسونو نکریزې ږدي، حال دا چې د دوی په وینا، تر نکاح مخکې د یو بل لاس ته لاس ورکول روا نه دي.
طالبانو همدارنګه له واده مخکې د هلک او نجلۍ د یو بل سره د ناستې، تګ راتګ او د یو بل د پېژندنې لپاره د اړیکو پر جوړولو هم نیوکه کړې او لیکلي یې دي چې د نامحرمو ښځو او نارینهوو خلوت او ناستې د دوی له نظره حرامې دي.
د خطبې په بله برخه کې د ښځو د ښکلا سالونونه هم تر نیوکې لاندې نیول شوي دي. د طالبانو د ارشاد وزارت ادعا کړې چې ځینې سالونونه «د غیرشرعي کړنو او فحشا د رامنځته کېدو مرکزونه» دي او د ابرو او مخ د وېښتانو لرې کول، د شونډو ښکاره کول او د ناوې لپاره د ځانګړو سینګارونو یادونه یې کړې ده.
دغه وزارت همدارنګه ویلي چې د ښځو له خوا د کور څخه د وتلو پر مهال د تیز بوی لرونکي عطر کارول د طالبانو له نظره روا نه دي، او د جوماتونو له خطیبانو یې غوښتي چې دغه موضوعات د جمعې په خطبو کې خلکو ته بیان کړي.
د طالبانو د ارشاد، حج او اوقافو وزارت هره اوونۍ د جمعې لمانځه لپاره یو واحد متن چمتو کوي او د هېواد جوماتونو ته یې استوي.
دا لارښوونې په داسې حال کې خپرې شوې چې طالبانو د ۲۰۲۱ کال له بیا واکمنېدو وروسته پر ښځو او نجونو پراخ محدودیتونه لګولي دي. په دغو محدودیتونو کې له شپږم ټولګي پورته د نجونو د زدهکړو بندیز، د ښځو د پوهنتوني زدهکړو ځنډول، د کار، تګ راتګ او نورو ټولنیزو فعالیتونو محدودول شامل دي. دغو تګلارو د ملګرو ملتونو، د بشري حقونو سازمانونو او ګڼو هېوادونو پراخې نیوکې راپارولي، خو طالبان دا موضوع خپلې کورنۍ پرېکړې بولي.
