د متحده ایالاتو حکومت له کانګرس څخه غوښتي چې د پوځي، امنیتي او ډیپلوماتیکو لګښتونو د پوره کولو لپاره نږدې ۸۸ میلیارډ ډالره اضافي بودجه تصویب کړي.
د سپینې ماڼۍ د مدیریت او بودجې دفتر د چهارشنبې په ورځ د استازو جرګې رئیس مایک جانسن ته په یوه رسمي لیک کې ویلي چې د دې بودجې لویه برخه د ایران پر ضد د امریکا د وروستیو پوځي عملیاتو له امله رامنځته شویو عاجلو اړتیاوو ته ځانګړې شوې ده.
د غوښتنې له مخې، له ۶۷ میلیارډ ډالرو څخه زیات بودجه د امریکا دفاع وزارت ته ځانګړې شوې چې پکې د مصرف شویو مهماتو د ځایناستي، د دفاعي صنعت د پیاوړتیا او د وسلهوالو ځواکونو د مهمو وړتیاوو د لوړولو لپاره ۲۱ میلیارډ ډالره شامل دي.
سپینې ماڼۍ همدارنګه د منځني ختیځ او جنوبي اسیا په سیمه کې د امریکا د سفارتونو او ډیپلوماتیکو مرکزونو د امنیت د پیاوړتیا لپاره شاوخوا ۳۰۰ میلیونه ډالره غوښتنه کړې ده. دغه غوښتنه وروسته له هغې مطرح شوې چې د وروستۍ جګړې پر مهال پر ځینو امریکايي ډیپلوماتیکو مرکزونو بریدونه وشول.
په لیک کې ویل شوي چې د دې بودجې یوه مهمه برخه به د «حماسي قهر» په نوم د پوځي عملیاتو د عاجلو اړتیاوو د تمویل لپاره ولګول شي.
دا بودجوي غوښتنه به لومړی د امریکا په کانګرس کې وڅېړل شي او له رایې ورکولو وروسته به د تصویب یا رد په اړه پرېکړه وشي. تر اوسه دا غوښتنه وروستۍ منظوري نه ده ترلاسه کړې.
