مارکو روبیو، د امریکا د بهرنیو چارو وزیر، به د سې شنبې څخه تر پنجشنبې پورې متحده عربي اماراتو، کویټ او بحرین ته سفر وکړي. دا به د ایران او امریکا ترمنځ د وروستي تفاهم له امضا وروسته منځني ختیځ ته د هغه لومړنی رسمي سفر وي.
د امریکا د بهرنیو چارو وزارت ویاند ټامي پیګوټ ویلي چې دغه سفر په داسې وخت کې ترسره کېږي چې د تهران او واشنګټن ترمنځ د تفاهم د عملي کېدو بهیر لا هم تر ارزونې لاندې دی او د سیمې امنیتي موضوعات د بحثونو مهم محور جوړوي.
د نوموړي په وینا، د هرمز تنګي له لارې د کښتیو د خوندي، بشپړ او ازاد تګ راتګ تضمین، د تفاهم د مادو عملي کېدل او د سیمهییز ثبات ساتل به د روبیو او د خلیج هېوادونو د چارواکو ترمنځ د خبرو مهم موضوعات وي.
د امریکا د بهرنیو چارو وزارت ویلي چې روبیو به د اماراتو، کویټ او بحرین له لوړپوړو چارواکو سره وګوري او په بحرین کې به د خلیج د همکارۍ شورا له استازو سره هم ځانګړې ناسته ولري.
واشنګټن وایي د دغو لیدنو موخه له سیمهییزو شریکانو سره لا زیاته همغږي او د ګډو امنیتي، اقتصادي او سیاسي لومړیتوبونو په اړه سلا مشورې دي.
دغه سفر په داسې حال کې ترسره کېږي چې د ایران او امریکا تر وروستي تفاهم وروسته د هرمز تنګي امنیت، د انرژۍ نړیوال بازار او د دواړو لورو د ژمنو د عملي کېدو بهیر د سیمهییزو او نړیوالو بحثونو له مهمو موضوعاتو څخه ګرځېدلي دي.
