د میدان وردګو ولایت کې د طالبانو د پولیسو قوماندانۍ ویاند محمد یوسف اسرار اعلان کړی چې د کابل-کندهار پر لویه لاره په یوې ترافیکي پېښه کې پنځه کسان مړه او یو بل ټپي شوی دی.
د هغه په وینا، دغه پېښه د میدان وردګو ولایت د نرخ ولسوالۍ په مربوطاتو کې رامنځته شوې ده.
اسرار ویلي چې په دې پېښه کې یو مازدا ډوله موټر له کرولا موټر سره ټکر کړی دی.
د طالبانو دغه چارواکي ویلي چې ټپي کس د درملنې لپاره روغتیايي مرکز ته لېږدول شوی دی.
د طالبانو د پولیسو قوماندانۍ ویاند د دې پېښې اصلي لامل د موټر چلوونکو بېاحتیاطي بللې ده.
د کابل-کندهار لویه لاره د افغانستان له تر ټولو بوختو او په عین حال کې له تر ټولو خطرناکو لویو لارو څخه ګڼل کېږي، چې هر کال لسګونه کسان پکې د ترافیکي پېښو له امله خپل ژوند له لاسه ورکوي.
کارپوهان وایي، د معیاري سړکونو نشتوالی، لوړ سرعت، د موټر چلوونکو بېاحتیاطي او کمزورې ترافیکي څارنه د افغانستان په لویو لارو کې د پېښو د زیاتوالي مهم عوامل دي.
