د امریکا مرستیال ولسمشر جيډي ونس ویلي چې که د واشنګټن او تهران ترمنځ توافق وشي، د ایران هېڅ ډول کنګل شوې شتمني به ازاده نه شي.
ونس څرګنده کړې چې د احتمالي توافق جوړښت داسې طرحه شوی چې د ایران له لوري د ژمنو د عملي کولو په صورت کې به مشخصې اقتصادي ګټې ترلاسه کړي، خو دا ګټې به د بندو مالي سرچینو د مستقیم آزادېدو له لارې نه وي.
هغه د دې میکانیزم په اړه نور جزئیات نه دي ورکړي، خو ټینګار یې کړی چې هر ډول اقتصادي امتیاز به د ایران له لوري د توافق د شرایطو د بشپړ عملي کېدو پورې تړلی وي.
د امریکا د مرستیال ولسمشر دغه څرګندونې داسې مهال مطرح کېږي چې د ایران او امریکا ترمنځ د مذاکراتو د پرمختګ نښې لیدل کېږي.
تر دې وړاندې د ایران د بهرنیو چارو وزیر عباس عراقچي ویلي وو چې احتمالي توافق تر بل هر وخت نهايي کېدو ته نږدې شوی دی.
بل لور ته د امریکا ولسمشر ډونالډ ټرمپ په تېرو کلونو کې څو ځله د هغو توافقونو مخالفت کړی و چې له مخې یې د ایران د کنګل شویو شتمنیو د آزادېدو امکان رامنځته کېده.
شنونکي وایي د ونس وروستۍ څرګندونې ښيي چې سپینه ماڼۍ هڅه کوي د هر نوي توافق اقتصادي چوکاټ له پخوانیو موافقو څخه جلا وساتي او د امریکا دننه د احتمالي سیاسي انتقادونو مخه ونیسي.
تر اوسه د احتمالي توافق بشپړ جزئیات نه دي خپاره شوي او نه هم تهران او واشنګټن د هغه د دقیقو مادو په اړه رسمي معلومات ورکړي دي.
د دې تحول اهمیت په دې کې دی چې د ایران د کنګل شویو شتمنیو موضوع تل د تهران او واشنګټن ترمنځ د مذاکراتو له مهمو او حساسو موضوعاتو څخه وه. د امریکا نوې څرګندونې ښيي چې که توافق هم وشي، د اقتصادي امتیازاتو بڼه به د پخوانیو توافقونو په پرتله توپیر ولري.
