د امریکا د دفاع وزیر پیت هګسټ د ایران پر ضد د نوو پوځي عملیاتو له پیل څو ساعته مخکې ویلي چې امریکایي ځواکونه به «سخت ګوزارونه» وکړي او د ایران مهم تأسیسات به په نښه کړي.
هګسټ دغه څرګندونې د امریکا د مرکزي قوماندانۍ په مرکز کې، چې د فلوریډا ایالت د ټامپا ښار کې موقعیت لري، کړې دي.
هممهاله د امریکا ولسمشر ډونالډ ټرمپ هم په سپینه ماڼۍ کې خبریالانو ته ویلي چې د ایران پر ضد عملیات دوام لري.
ټرمپ وویل: «پرون مو سخت ګوزار ورکړ، او نن به هم یو بل سخت ګوزار ورکړو.»
د امریکا ولسمشر ټینګار وکړ چې واشنګټن د یوه احتمالي توافق ترلاسه کولو ته نږدې شوی و، خو خبرې اترې بریالۍ نه شوې.
د هغه څرګندونې ښيي چې سپینه ماڼۍ د روانو پوځي اقداماتو او د تهران ـ واشنګټن د مذاکراتو ترمنځ مستقیم تړاو ویني.
دغه پرمختګونه داسې مهال رامنځته کېږي چې امریکایي چارواکو مخکې د یوې اپاچي چورلکې سقوط د نویو عملیاتو له عواملو څخه یاد کړی و.
واشنګټن ادعا کوي چې ایران د دغې پېښې مسئولیت لري، خو ایراني چارواکو تر اوسه دا ادعا نه ده منلې.
په وروستیو ورځو کې د تهران او واشنګټن ترمنځ ترینګلتیاوې په بېساري ډول زیاتې شوې دي.
د دواړو لورو متقابل پوځي اقدامات او توندې سیاسي څرګندونې د دې اندېښنې لامل شوي چې شخړه ښايي لا پراخه شي او د سیمې امنیت او ثبات له نویو ګواښونو سره مخ کړي.
د دې تحول مهم اړخ دا دی چې د مذاکراتو له بنبست سره هممهاله د پوځي فشار زیاتوالی ښيي چې د دواړو هېوادونو اړیکې یو ځل بیا د مستقیمې تقابل مرحلې ته نږدې شوې دي؛ داسې وضعیت چې کولای شي د منځني ختیځ پر امنیت، د انرژۍ پر بازارونو او نړیوالو سیاسي معادلو ژور اغېز وکړي.
