جيډي ونس، د امریکا د ولسمشر مرستیال، ویلي چې له ایران سره هر ډول احتمالي شخړه به د عراق او افغانستان د جګړو په څېر په اوږده او فرسایشي جګړه بدله نه شي.
ونس د جون په ۹مه له یواېسای ټوډې ورځپاڼې سره په خبرو کې وویل چې د ایران په اړه د امریکا د حکومت د پالیسۍ د بریا په اړه ډاډ لري.
هغه وویل: «فکر کوم موږ به بریالي شو. که ډیپلوماسي په پای کې ناکامه شي، ولسمشر نور وسایل هم په اختیار کې لري.»
د امریکا مرستیال ولسمشر زیاته کړه چې باور لري یو کال وروسته به نور د واشنګټن او تهران ترمنځ د احتمالي جګړې په اړه بحث نه وي.
ونس ټینګار وکړ چې تر هغه وخته چې اصلي هدف د ایران د اټومي وسلو د ترلاسه کولو مخنیوی وي، وضعیت به د پراخې او اوږدمهالې جګړې پر لور ولاړ نه شي.
هغه د ډیپلوماټیکو هڅو د دوام یادونه هم وکړه، خو ویې ویل که ډیپلوماسي بریالۍ نه شي، د امریکا حکومت نور انتخابونه هم لري.
د ونس څرګندونې داسې مهال مطرح کېږي چې د ایران او امریکا ترمنځ کړکېچ په وروستیو اونیو کې زیات شوی او د دواړو هېوادونو ترمنځ د احتمالي پوځي شخړې په اړه بحثونه دوام لري.
تر اوسه ایراني چارواکو د امریکا د مرستیال ولسمشر دغو تازه څرګندونو ته رسمي غبرګون نه دی ښودلی.
د دې موضوع مهم اړخ دا دی چې واشنګټن په داسې حال کې د ډیپلوماسۍ او فشار دواړو لارو ته اشاره کوي چې د ایران د اټومي پروګرام راتلونکی لا هم د سیمې او نړۍ له مهمو امنیتي موضوعاتو څخه ګڼل کېږي.
