په داسې حال کې چې د ایران او امریکا ترمنځ مذاکرات په اسلامآباد کې اتم ساعت ته داخل شوي، لا هم د هرمز تنګي پر سر موافقه نه ده شوې.
د والسټریټ ژورنال د راپور له مخې، ایران د دې مهم سمندري لارې لپاره یو نوی میکانیزم جوړ کړی چې د «تهران عوارض» په نوم یاد شوی دی.
راپور وایي چې د وروستیو پوځي کړکېچونو وروسته، ایران د کښتیو پر تګ راتګ محدودیتونه زیات کړي او د عبور لپاره یې نوي شرایط وضع کړي دي.
د معلوماتو له مخې، د چین، هند او یونان د کښتیو مالکین اړ دي چې د ایران له سپاه سره مستقیمې خبرې وکړي او د تېرېدو لپاره پیسې ورکړي.
همداراز، هغه کښتۍ چې اجازه ترلاسه کوي، اوس د پخواني نړیوال مسیر پر ځای د ایران ساحلي لارې ته نږدې او د قشم او لارک ټاپوګانو ترمنځ حرکت کوي.
امریکا او د خلیج هېوادونه د دې ډول تګلارې مخالفت کوي او دا د نړیوالو اصولو خلاف بولي.
