د شانګهای همکارۍ سازمان د ملي همغږوونکو لومړۍ غونډه د دوشنبې په ورځ د تلې په شپږمه په اسلاماباد کې پیل شوه؛ هغه غونډه چې د ۲۰۲۶ تر ۲۰۲۷ کال پورې د سازمان د مشرانو د شورا د پاکستان د ریاست د عملي پروګرامونو د پلي کېدو لومړنی رسمي ګام بلل کېږي.
د پاکستان د بهرنیو چارو وزارت ویلي چې دا غونډه به د سپټمبر تر ۳۰مې دوام وکړي او د سازمان د غړو هېوادونو ملي همغږي کوونکي او د شانګهای همکارۍ سازمان د دارالانشاء استازي به پکې ګډون وکړي.
د غونډې مشري د پاکستان ملي همغږي کوونکی کوي. ګډونوال د اسلاماباد د ریاست پر مهال د سازمان د فعالیتونو د پروګرام، د راتلونکو غونډو او نورو مهمو ناستو لپاره پر چمتووالي او د سازمان د اجنډا پر نورو موضوعاتو خبرې کوي.
پاکستان د شانګهای همکارۍ سازمان د مشرانو د شورا د خپل ریاست لپاره «له لیدلوري تر عمله؛ نښلون، نوښت او ګډه سوکالي» شعار ټاکلی دی.
اسلاماباد وايي چې د دې دورې له مهمو لومړیتوبونو څخه د سیمې د هېوادونو ترمنځ د اړیکو او نښلون پیاوړتیا، د نوښت پراختیا، د اقتصادي همکاریو زیاتول او د غړو هېوادونو د خلکو ترمنځ د اړیکو پراخول دي.
دا تګلاره ښيي چې پاکستان هڅه کوي خپل یو کلن ریاست یوازې د رسمي غونډو تر جوړولو محدود نه کړي، بلکې د سازمان همکارۍ اقتصادي پروژو، سیمهییز نښلون او ټکنالوژۍ ته نږدې کړي.
د شانګهای همکارۍ سازمان د مشرانو د شورا د سپټمبر د لومړۍ نېټې په غونډه کې، چې په بشکېک کې ترسره شوه، د ۲۰۲۶ تر ۲۰۲۷ کال پورې د سازمان مشري پاکستان ته وسپارل شوه.
د پاکستان لومړي وزیر شهباز شریف تر دې مخکې د خپل هېواد د ریاست لپاره د معلوماتي ټکنالوژۍ او مصنوعي ځیرکتیا، انرژۍ، د بېوزلۍ کمولو او د ناورینونو د مدیریت په ګډون پر څو برخو ټینګار کړی و.
د اسلاماباد د روانې غونډې اهمیت په دې کې دی چې د راتلونکو لوړپوړو ناستو لپاره لومړنۍ همغږي له همدې پړاو څخه پیلېږي. د دې دورې تر ټولو مهمه غونډه د شانګهای همکارۍ سازمان د مشرانو د شورا غونډه ده چې ټاکل شوې د ۲۰۲۷ کال په اګست کې په پاکستان کې ترسره شي.
له همدې امله، اوسنۍ غونډه یوازې د ملي همغږوونکو یوه اداري ناسته نه ده؛ بلکې د پاکستان د ریاست د عملي چوکاټ د جوړېدو لومړنی پړاو دی.
د دې بهیر پرمختګ به په راتلونکو میاشتو کې څرګنده کړي چې اسلاماباد تر کومه بریده کولی شي خپل اعلان شوي لومړیتوبونه د سازمان د غړو هېوادونو ترمنځ په عملي همکاریو او ګډو پروګرامونو بدل کړي.
