د طالبانو د کورنیو چارو وزیر سراج الدین حقاني د حج مراسمو په څنډه کې په سعودي عربستان کې د سوریې د کورنیو چارو وزیر انس خطاب سره لیدلي دي؛ هغه لیدنه چې د دواړو لورو ترمنځ د رسمي ډیپلوماټیکو اړیکو د نشتون سربېره د سیاسي او امنیتي څارونکو پام یې ځان ته اړولی دی.
د طالبانو د کورنیو چارو وزارت سلاکار محمد جلال د اېکس په ټولنیزه شبکه کې د دې لیدنې انځور خپور کړی او ویلي یې دي چې د طالبانو د استخباراتو رئیس عبدالحق وثیق او د سوریې د استخباراتي ادارې مشر حسین سلامه هم په غونډه کې حاضر وو.
محمد جلال د لیدنې د اجنډا، احتمالي هوکړو او یا د خبرو د اصلي موضوعاتو په اړه نور جزییات نه دي ورکړي. همدارنګه د لیدنې د ترسره کېدو دقیق وخت هم نه دی څرګند شوی.
د خپاره شوي انځور له مخې، لیدنه په نسبتاً غیر رسمي فضا کې ترسره شوې ده، خو د دواړو لورو د لوړپوړو امنیتي او استخباراتي چارواکو حضور د دې غونډې اهمیت زیات کړی دی.
دغه لیدنه په داسې حال کې ترسره کېږي چې د طالبانو حکومت او د سوریې اوسنی حکومت لا هم رسمي ډیپلوماټیکې اړیکې نه لري. سوریې تر اوسه د طالبانو حکومت په رسمیت نه دی پېژندلی او د نړیوالې ټولنې د ډېری هېوادونو په څېر یې له کابل سره رسمي اړیکې نه دي ټینګې کړې.
سره له دې، په وروستیو میاشتو کې داسې نښې لیدل شوې چې دواړه لوري غواړي د اړیکو ځینې لارې پرانیستې وساتي. د طالبانو د وزیرانو شورا رئیس محمد حسن اخند تر دې وړاندې د سوریې د لنډمهالي ولسمشر احمد الشرع د ټاکل کېدو هرکلی کړی و او د دواړو هېوادونو ترمنځ یې د اړیکو د پراختیا هیله څرګنده کړې وه.
تر اوسه د طالبانو او د سوریې د نوي حکومت ترمنځ اړیکې محدودې پاتې دي او دمشق د رسمي اړیکو د جوړولو په اړه کومه څرګنده پرېکړه نه ده اعلان کړې.
د امنیتي او استخباراتي مشرانو ګډ حضور دا احتمال پیاوړی کوي چې په غونډه کې د سیمه ییز امنیت، د استخباراتي همغږۍ او د راتلونکو همکاریو اړوند موضوعات هم مطرح شوي وي، که څه هم دواړو لورو په رسمي ډول د خبرو جزییات نه دي خپاره کړي.
دا لیدنه داسې مهال ترسره کېږي چې طالبان د خپلو بهرنیو اړیکو د پراخولو او د سیاسي انزوا د کمولو هڅه کوي، او د سوریې نوی حکومت هم د سیمې په سیاسي معادلو کې د خپل نوي ځای د تعریفولو په پړاو کې دی. له همدې امله د دواړو لورو هر ډول تماس کولای شي د راتلونکو سیاسي او ډیپلوماټیکو همکاریو د ارزونې یوه مهمه نښه وبلل شي.
