د افغانستان پخواني ولسمشر حامد کرزي د اروپايي ټولنې د یوې لوړپوړې چارواکې د وروستیو څرګندونو په غبرګون کې پاکستان تورن کړی چې په تېرو څلورو لسیزو کې یې افراط پالنه د خپلې بهرنۍ تګلارې د یوې وسیلې په توګه کارولې او ملاتړ یې کړی دی.
کرزي په خپلې خپرې شوې لیکنې کې ویلي چې د پاکستان اوسنی امنیتي وضعیت او ستونزې د هغو پالیسیو پایله ده چې د افغانستان پر ضد د موخو د ترلاسه کولو لپاره یې افراط پالنه کارولې ده.
هغه ویلي: «د پاکستان اوسنی وضعیت او امنیتي ستونزې د هغو پالیسیو پایله ده چې په تېرو څلورو لسیزو کې یې د افغانستان پر ضد د دښمنانه موخو لپاره افراط پالنه کارولې ده.»
د افغانستان پخواني ولسمشر زیاته کړې چې دغو پالیسیو په افغانستان کې پراخه بې ثباتي رامنځته کړې او ګڼ انساني او مالي زیانونه یې اړولي دي.
کرزي له اروپايي هېوادونو او اروپايي ټولنې څخه د افغانستان له خلکو سره د بشري مرستو له امله مننه کړې او له اروپايي چارواکو یې غوښتي چې د سیمې د امنیتي بحرانونو د ارزونې پر مهال د ناامنۍ اصلي عوامل او بهرنۍ اغېزې په پام کې ونیسي.
دغه څرګندونې وروسته له هغې مطرح شوې چې د اروپايي ټولنې د بهرنۍ تګلارې مسئولې کایا کالاس د پاکستان د بهرنیو چارو له وزیر سره په ګډه غونډه کې ویلي وو چې د پاکستان او طالبانو ترمنځ وروستیو نښتو بشري اندېښنې زیاتې کړې او په سیمه کې یې د بې ثباتۍ او افراط پالنې د پراخېدو خطر لوړ کړی دی.
نوموړې ویلي وو چې پاکستان د نړیوالو قوانینو له مخې د ځان او خپلو خلکو د دفاع حق لري، خو د کړکېچ د کمولو لپاره خبرې اترې تر پوځي بریدونو اغېزمنې دي.
دغه څرګندونې په اسلام آباد کې د اروپايي ټولنې او پاکستان ترمنځ د ستراتیژیکو خبرو اترو د اتم پړاو پر مهال شوې دي؛ هغه غونډه چې پکې د افغانستان وضعیت او سیمه ییز امنیت د بحث له مهمو موضوعاتو څخه وو.
کرزي د خپلې لیکنې په وروستۍ برخه کې د افغانستان او اروپا ترمنځ تاریخي اړیکو ته هم اشاره کړې او ویلي یې دي چې د دواړو لورو اړیکې له یوې پېړۍ راهیسې دوستانه او رغنده پاتې شوې دي.
د کرزي وروستۍ څرګندونې داسې مهال مطرح کېږي چې د افغانستان، پاکستان او سیمې د امنیت په اړه بحثونه یو ځل بیا د نړیوالو سیاسي غونډو مهم محور ګرځېدلي دي.
