د اټومي انرژۍ نړیوالې ادارې (IAEA) عمومي رئیس رافایل گروسي ویلي چې د ایران د اټومي پروګرام اوسنی وضعیت د هغه وخت له شرایطو سره بنسټیز توپیر لري چې د برجام اټومي تړون لاسلیک شوی و.
ګروسي د الجزیرې شبکې سره په مرکه کې وویل، که د ایران او نړیوالو قدرتونو ترمنځ نوی توافق رامنځته کېږي، نو باید د نویو واقعیتونو او بدلو شویو شرایطو پر بنسټ طرحه شي.
هغه زیاته کړه چې هر احتمالي راتلونکی توافق به په حقیقت کې «له جګړې وروسته توافق» وي او نه شي کولای د پخوانیو معیارونو او شرایطو پر بنسټ تنظیم شي.
د اټومي انرژۍ نړیوالې ادارې مشر ټینګار وکړ چې که څه هم د جګړې پر مهال د ایران ځینې اټومي تاسیسات فزیکي زیانمن شوي، خو د دې هېواد اټومي پوهه، تخنیکي وړتیاوې او ټکنالوژي په وروستیو کلونو کې د پام وړ پرمختګ کړی دی.
د هغه په وینا، د برجام د لاسلیک پر مهال ایران د سانتریفیوژونو له زړو نسلونو کار اخیست، خو اوس پرمختللو او چټکو ماشینونو ته لاسرسی لري چې د لږ شمېر دستګاوو په وسیله هم د بډاینې لوړه وړتیا رامنځته کولای شي.
ګروسي وویل: «برجام د خپل وخت محصول و. اوس د شرایطو له بدلون سره یو بل ډول توافق ته اړتیا ده.»
د نوموړي څرګندونې په داسې حال کې مطرح کېږي چې ایراني چارواکي وایي د واشنګټن او تهران ترمنځ روانې خبرې تر هر څه وړاندې د جګړې پای ته رسولو او د تاوتریخوالي کمولو لپاره دي او اوسنۍ رایزني د اټومي مذاکراتو په چوکاټ کې نه ارزوي.
په وروستیو میاشتو کې د ایران د اټومي پروګرام راتلونکی او د نوي احتمالي توافق څرنګوالی یو ځل بیا د تهران او نړیوالو قدرتونو ترمنځ د ډیپلوماتیکو بحثونو له مهمو محورونو څخه ګرځېدلی دی.
شنونکي باور لري چې د ایران د اټومي ظرفیتونو بدلون او د سیمې وروستي امنیتي تحولات به د هر نوي توافق پر جوړښت او شرایطو مستقیم اغېز ولري.
