د طالبانو د اقتصادي مرستیال عبدالغني برادر او د افغانستان لپاره د امریکا د متحده ایالتونو د بهرنیو چارو وزارت د پخواني ځانګړي استازي زلمي خلیلزاد ترمنځ نن، دوشنبه د وږي ۱۶مه، په کابل کې لیدنه او خبرې شوې دي.
د طالبانو د اقتصادي مرستیال دفتر وايي، په دې لیدنه کې د سیمې د وضعیت، په افغانستان کې د حکومتولۍ او بنسټیزو پروژو د پرمختګونو او په بېلابېلو برخو کې د بهرنیو شرکتونو د پانګونې پر فرصتونو خبرې شوې دي.
د زلمي خلیلزاد په وینا، په افغانستان کې د بهرنیو پانګونو د راجلبولو لپاره مناسب شرایط برابر شوي دي. هغه ویلي چې د سعودي عربستان، قطر، اذربایجان او ناروې یو شمېر شرکتونه په بېلابېلو برخو، په ځانګړي ډول د تېلو او ګازو د اکتشاف او استخراج، پانګونې ته لېوالتیا لري.
د طالبانو د اقتصادي مرستیال دفتر تر اوسه د دغو احتمالي پانګونو د کچې او یا د لېواله شرکتونو نومونه نه دي خپاره کړي.
د نیمروز په ارزونه، د برادر او خلیلزاد لیدنه په داسې مهال کېږي چې طالبان هڅه کوي د افغانستان د اقتصادي فرصتونو لپاره بهرني پانګهوال راجلب کړي. خو د احتمالي پانګونو د کچې، شرکتونو او عملي تړونونو په اړه د مشخصو معلوماتو نشتوالی ښيي چې تر اوسه باید د دغو څرګندونو ترمنځ د پانګونې د لېوالتیا او د عملي پانګونې ترمنځ توپیر وشي. که دغه لېوالتیا په واقعي تړونونو او پروژو بدله شي، د افغانستان د انرژۍ په برخه کې به د طالبانو لپاره د پام وړ اقتصادي اهمیت ولري.
