د فرانسې ولسمشر امانوئل مکرون د سعودي عربستان د ولیعهد محمد بن سلمان سفر فرانسې ته د پاریس او ریاض په اړیکو کې مهم پړاو بللی دی.
مکرون ویلي، فرانسه او سعودي عربستان د سیمهییزو ننګونو پر وړاندې تل د سولې او ثبات لپاره هڅې کړې دي او د دواړو هېوادونو ترمنځ به په دې برخه کې سلا مشورې دوام ولري.
هغه زیاته کړې چې د پاریس او ریاض همکاري پر سترو پروژو، پرمختللو ټکنالوژیو، پانګونې او نړیوالو پېښو هم ولاړه ده.
د فرانسې ولسمشر ویلي چې دواړو هېوادونو تر اوسه ډېرې لاسته راوړنې لرلې او کولای شي د خپلو همکاریو کچه نوره هم لوړه کړي.
فرانسې ته د محمد بن سلمان سفر په داسې وخت کې ترسره کېږي چې په منځني ختیځ کې جګړه او پوځي کړکېچونه دوام لري او سعودي عربستان هڅه کوي له سیمهییزو او نړیوالو لوبغاړو سره خپلې اړیکې او همکارۍ پراخې کړي.
ریاض له سیمهییزو هېوادونو سره د اړیکو د پیاوړتیا ترڅنګ، له امریکا او اروپايي هېوادونو سره د سیاسي، اقتصادي او امنیتي همکاریو د پراختیا هڅې هم کوي.
