سهیلا طاهري، د برازیل د فوټبال د پخواني ستوري روبرتو کارلوس مېرمن، د خپل مېړه د مسلمانېدو په اړه خپاره شوي راپورونه رد کړي او د دغو اوازو د پای ته رسېدو غوښتنه یې کړې ده.
طاهري ویلي چې په ټولنیزو شبکو کې د روبرتو کارلوس د دین د بدلولو په اړه خپاره شوي مطالب حقیقت نه لري او د خلکو د دیني باورونو په اړه باید یوازې د معلوماتو له کره کولو وروسته خبرې وشي.
دغه اوازه وروسته له هغه خپره شوه چې د ترکیې د عدالت او پراختیا ګوند غړي علي شاهین په ټولنیزه شبکه اېکس کې ادعا وکړه چې برازیل ته د خپل سفر پر مهال یې له یوه کس، چې نوم یې شیخ جهاد حماده ښودل شوی، اورېدلي چې روبرتو کارلوس له سهیلا طاهري سره له واده وروسته نوموړي ته ورغلی، شهادتین یې ویلي او مسلمان شوی دی.
روبرتو کارلوس څو ساعته وروسته دغه ادعا ناسمه وبلله او ویې ویل چې اسلام ته ډېر درناوی لري، خو مسلمان شوی نه دی.
هغه همداراز ویلي چې د ده د واده مراسم د دواړو کورنیو د باورونو له مخې ترسره شوي وو؛ د ده کورنۍ کاتولیکه ده او د مېرمنې کورنۍ مسلمانه ده.
سهیلا طاهري هم دغه ادعا رد کړې او ویلي یې دي چې د جهاد حماده په نوم هېڅ شیخ یا دیني عالم نه پېژني.
هغې د دې ادعا هغه برخه هم ناسمه بللې چې ګواکې نوموړی شیخ د روبرتو کارلوس په روغتون کې حضور درلود او ورته یې قرآن کریم تلاوت کړی و.
طاهري ټینګار کړی چې اسلام ته درناوی او د قرآن کریم په اړه خبرې کول د اسلام منلو په معنا نه دي.
هغې له رسنیو او د ټولنیزو شبکو له کاروونکو غوښتي چې د خلکو د دیني باورونو په اړه د مطالبو له خپرولو مخکې د هغو دقت او کرهوالی وڅېړي.
سهیلا طاهري زیاته کړې چې نوموړې غوره ګڼي د خپل او د روبرتو کارلوس شخصي ژوند له رسنیو لرې پاتې شي.
