د امریکا د دلاویر پوهنتون ساینسپوهان د سمندرونو د معلوماتو د راټولولو لپاره یوه نوې لاره څېړي چې په کې کوسهماهيان د «خوځنده حسګرونو» په توګه کارول کېږي.
د رویټرز د راپور له مخې، پر کوسهماهیانو نصبېدونکي حسګرونه د اوبو تودوخه، ژوروالی او برېښنايي رسانایي ثبتوي. دا معلومات له څېړونکو سره مرسته کوي چې د سمندر د پاسنیو طبقو، په ځانګړي ډول د اوبو د «ګډېدونکې طبقې»، وضعیت ښه وڅېړي.
د دې څېړنې مشر ارون کارلایل وایي، دغه طبقه د توپانونو د پیاوړتیا په برخه کې مهمه ده؛ ځکه د سمندر ګرمه اوبه کولی شي توپانونو ته د لا پیاوړي کېدو لپاره اړینه انرژي برابره کړي.
څېړونکو د دې پروژې لپاره د کوسهماهیانو څلور ډولونه مناسب بللي دي چې پکې لنډباله ماکو کوسه، شنه کوسه، هواره سرڅکشي کوسه او نابالغ لویه سپینه کوسه شاملې دي.
په دې طریقه کې کوسهماهي په لنډمهاله توګه د طعمه لرونکي چنګک په وسیله نیول کېږي او حسګر یې له پنځو دقیقو په کم وخت کې د شا له باله سره نښلول کېږي. کله چې کوسه د اوبو سطحې ته نږدې شي، حسګر ثبت شوي معلومات د سپوږمکۍ له شبکې څخه څېړونکو ته لېږي. وروسته د نښلولو مواد په تدریجي ډول له منځه ځي او حسګر له بدن څخه جلا کېږي.
څېړونکي د هرې کوسه له بېرته خوشې کولو مخکې د هغې روغتیايي وضعیت هم ارزوي، څو ډاډ ترلاسه کړي چې حیوان ته زیان نه دی اوښتی.
ساینسپوهان هیله لري چې د دې لارې راټول شوي معلومات به د سمندر د اوبو د تودوخې او نورو شرایطو په اړه د څېړونکو پوهه زیاته کړي او په پایله کې د توپانونو د شدت لا دقیقې وړاندوینې او د امریکا په ختیځو ساحلي سیمو کې د چمتووالي له ښه کېدو سره مرسته وکړي.
څېړونکو تر دې مخکې هم له سمندري ژوو، لکه فیلفکونو، څخه د سمندري معلوماتو د راټولولو لپاره کار اخیستی دی. د دوی په وینا، د کوسهماهیانو پراخ جغرافیایي شتون کولی شي دغه ژوي د سمندر له بېلابېلو برخو څخه د معلوماتو د راټولولو لپاره مناسب وسیله وګرځوي.
