د هند لومړي وزیر نارېندرا مودي، د کاري او تعلیمي فرصتونو د کمښت په اړه د ځوانانو له پراخو اعتراضونو وروسته، په انسټاګرام او نورو ټولنیزو شبکو کې خپل حضور زیات کړی او هڅه کوي د ۲۰۲۹ کال تر عمومي ټاکنو مخکې د ځوانو رایه ورکوونکو ملاتړ ترلاسه کړي.
د رویټرز د راپور له مخې، په وروستیو اوونیو کې د مودي هغه لنډې ویډیوګانې خپرې شوې چې د سیلفي په بڼه، غیررسمي لباس، رېپ موسیقۍ او ان د «فرېنډز» مشهورې تلویزیوني لړۍ له موسیقۍ سره ثبت شوې دي. د هغه وروستۍ ویډیو هم د «سلام دوستان» په جمله پیلېږي او د واکمن ګوند د ډیجیټلي کمپاین برخه بلل کېږي.
دا بدلون وروسته له هغې رامنځته شوی چې د جولای په میاشت کې د طب د سراسري ازموینې د پوښتنو د افشا کېدو، د زدهکوونکو او د کار غوښتونکو د اعتراضونو او د هند د پوهنې د وزیر له استعفا وروسته پر حکومت فشارونه زیات شول.
د راپور له مخې، مودي د خپلې کابینې له وزیرانو هم غوښتي چې د ځوانانو په خوښو ټولنیزو شبکو کې ډېر فعال شي او داسې طبیعي او لږ اېډېټ شوې محتوا خپره کړي چې د ځوان نسل پام ځان ته راواړوي. د هند د بهرنیو چارو وزارت هم اعلان کړی چې خپل فعالیت به په سنپچېټ کې پیل کړي.
شنونکي وایي، د هند د نږدې ۱.۴ میلیارده نفوس له نیمایي ډېر خلک تر ۳۵ کلونو کم عمر لري او همدا ځوان نسل د ۲۰۲۹ کال په عمومي ټاکنو کې مهم او ټاکونکی رول لرلای شي. خو ځینې کارپوهان باور لري چې د دې تګلارې بریالیتوب به تر ډېره د ځوانو کاروونکو له لوري د سیاسي محتوا د منلو کچې پورې تړلی وي.
