د بلخ پخواني والي عطا محمد نور د خالد بن ولید او د دغه ولایت د ځینو نورو ښارګوټو د ملکیت ادعا رد کړې او ویلي یې دي چې طالبان د پانګه والو، دولتي ادارو او نورو کسانو جایدادونه له ده سره تړي.
نور د یکشنبې په ورځ په یوه پیغام کې ویلي چې دی اساساً د هېڅ ښارګوټي مالک نه دی. هغه ټینګار کړی چې د خالد بن ولید ښارګوټی د پانګه والو ملکیت دی.
نوموړي د ډیپلوماتیک ښارګوټي په اړه هم ویلي چې دغه ښارګوټی دولتي ملکیت او د ښاروالۍ اړوند دی او له ده سره یې تړل بې بنسټه دي.
د نور دغه څرګندونې وروسته له هغې شوې چې په بلخ کې د ۱۳ ښارګوټو د ځمکو د «امارتي» بللو په اړه راپورونه خپاره شول. د دغو راپورونو له مخې، خالد بن ولید ښارګوټی هم په یادو ښارګوټو کې شامل دی.
نور ویلي، هغه ښارګوټي چې د ده د مسوولیت پر مهال په بلخ کې جوړ شوي، د خصوصي پانګه والو له خوا او له قانوني لارو جوړ شوي دي.
په همدې حال کې، طالبان په بلخ کې د ځمکو او استوګنیزو ښارګوټو د ملکیتونو د څېړلو بهیر هم پر مخ وړي. د خپرو شویو اسنادو له مخې، د دغه ولایت په ۳۸ استوګنیزو ښارګوټو کې پېر او پلور، ودانیز کارونه او د ملکیتونو لېږد درول شوي دي.
عطا محمد نور د دغو ښارګوټو د ملکیت ادعاوې رد کړې دي، خو د هر یوه ملکیت په اړه بشپړ او خپلواک معلومات په لاس کې نشته.
